БИШКЕК, 23-окт. — Sputnik. Биринчи вице-премьер Кубатбек Боронов "Русгидро" Жогорку Нарын каскадына салган курулуштары боюнча документтерди толук бербегендиктен кыргыз тарап канча каражат кеткенин иликтөө үчүн толук аудит жүргүзө албай жатканын айтты.
2018-2019-жылдардагы күз-кыш мезгилине карата Кыргызстандын экономика тармактарын жана калкын даярдоо боюнча өкмөттүн иши жөнүндөгү маселени карады.
Аталган комитеттин төрагасы Кожобек Рыспаев Кыргызстанды 37 миллион долларга сотко берген "Русгидронун" иши эмне болуп жатканына кызыкты.
"Ошол жакка кеткен чыгымды (Жогорку Нарын каскадына — ред.) аудит менен текшерип, качан аягына чыгасыңар? Кыргыз тарап чындап эле ошончо акча кеткен-кетпегенин далилдеши керек", — деди депутат.
Өз кезегинде Боронов аталган компания документтерди толук бербегендиктен аудит жүрбөй жатканын белгиледи.
"Азыр биз документтерди толук ала албай, аудит жүргүзө албай отурабыз. Алар сотко берди. Сотто териштирүү жүрө турган болсо кеткен чыгымды такташ үчүн аудит жүрүшү керек", — деди Боронов.
Эске салсак, Жогорку Нарын каскадына ГЭС куруу аракеттери Кыргызстан менен Россиянын 2012-жылдын 20-сентябрында кол коюлган келишиминин негизинде башталган. Курула турчу төрт гидроэлектростанциянын кубаттуулугу 327 мегаватты түзмөк. Бирок 2015-жылдын аягында Кыргызстан келишимди жокко чыгарган.
Кийин кыргыз өкмөтү 2017-жылдын 10-июлунда Чехиянын Liglass Trading CZ, SRO компаниясы менен Жогорку Нарын каскадын жана чакан ГЭСтерди куруу боюнча келишим түзгөн. Аталган компания Кыргызстандын "Русгидрого" карыз болгон 37 миллион долларын төлөө милдетин алган. Бирок кийинчерээк Liglass Trading CZ, SRO компаниясы төлөй албай калганы маалым болуп, келишим бир тараптуу жокко чыгарылган.