Жогорку Нарын каскадын куруу боюнча Россия менен түзүлгөн келишим жокко чыгарылды

© Sputnik / Табылды КадырбековЖогорку Нарын каскадынын жумушчусу. Архив
Жогорку Нарын каскадынын жумушчусу. Архив - Sputnik Кыргызстан
Жазылуу
Кыргыз тарап кыска мөөнөттүн ичинде Россия тарап короткон каражаттарды аныктоо үчүн эл аралык аудит жүргүзүүнү көздөп жатат.

БИШКЕК, 10-авг. — Sputnik. Кыргызстан менен Россия өкмөттөрүнүн ортосундагы Камбар-Ата ГЭС-1 жана Жогорку Нарын каскадынын курулушу тууралуу келишим расмий жокко чыгарылды. Бул тууралуу "Улуттук энергетикалык холдинг компаниясы" ачык акционердик коомунун маалымат кызматынан кабарлашты. 

Учурда эки тарап келишим күчүндө турган маалда пайда болгон бардык чарбалык маселелерди жөнгө салуу боюнча сүйлөшүүлөрдү жүргүзүп жатышат. 

"Ошол эле учурда ГЭСтин курулушу жана эксплуатациясы менен алектенүүсү керек болгон Россиянын компанияларындагы үлүштөрүн кыргыз тарапка өткөрүп берүү маселелери талкууланып жатат", — деп айтылат маалыматта. 

Ведомстводон кабарлашкандай кыргыз тарап кыска мөөнөттүн ичинде келишим күчүндө турган маалда Россия тарап короткон каражатты аныктоо үчүн эл аралык аудит жүргүзүү керек деген пикирде. 

Эл аралык аудит өз тыянагын чыгаргандан кийин кыргыз тарап Россиянын чыгымын компенсациялоого даяр экендиги белгиленет. 

Экскаватордун ковшун оңдоо иштери. Архив - Sputnik Кыргызстан
Жарым кылымдык кептер: Кыргызстандагы кагаз бетинде калган ири долбоорлор
Жогорку Нарын каскадындагы гидроэлектростанциясынын курулуш иштери кыргыз-орус өкмөттөр ортосундагы келишимге кол коюлгандан кийин башталган (2012-жыл, 20-сентябрь). ГЭСтин кубаттуулугу 237 мегаватты түзөт деп болжолдонгон. 

Бирок өткөн жылдын акырында президент Алмазбек Атамбаев Кыргызстан келишимден чыгып, жаңы инвесторлор изделиши мүмкүн экенин билдирген. Өлкө башчы учурдагы экономикалык абалга байланыштуу Россия өзүнүн милдеттерин аткара албай турганын белгилеген. Буга ылайык өкмөт келишимди денонсациялоого аракетттерди көрүп баштаган. 

Келишимди денонсациялоо жарлыгы президент тарабынан үстүбүздөгү жылдын 22-январында кол коюлган. 

Жаңылыктар түрмөгү
0