БИШКЕК, 21-май — Sputnik. Быйыл өлкөнүн биринчи адамдарынын бардыгы орозо кармап жатат. Бул тууралуу алардын маалымат катчылары Sputnik Кыргызстан агенттигине тастыктады.
Президент Сооронбай Жээнбеков, Жогорку Кеңештин төрагасы Дастан Жумабеков жана премьер-министр Мухаммедкалый Абылгазиев бир нече жылдан бери кармап келе жатканы айтылса, Жогорку соттун төрайымы Айнаш Токбаева 30 жылдан бери рамазан айында ооз бекитери белгилүү болду.
Ал эми министрлерден өзгөчө кырдаалдар жана саламаттык сактоо тармактарынын жетекчилери Нурболот Мирзахмедов менен Космосбек Чолпонбаев орозо тутту.
Баса, Sputnik агенттигинин материалынан ыйык рамазан айында орозо туткан адамдарга жасоого болбой турган нерселер менен тааныша аласыз. Тыюу салынган кадамдар тууралуу Кыргызстан мусулмандар дин башкармалыгынын фатва бөлүмүнүн адиси Бактияр Токтогазы уулу түшүндүрүп берген.