БИШКЕК, 25-янв. — Sputnik. Борбор калаада Чүй проспектиси менен Калык Акиев көчөсүнүн кесилишиндеги кафенин эмнеге түрттүрүлүп жаткандыгын Бишкектин Жерди колдонуу жана курулуш боюнча башкармалыгынын жетекчиси Талантбек Иманакун уулу айтып берди.
Анын айтымында, 2017-жылы мыйзамсыз имараттарды түрттүрүү боюнча ыкчам штаб түзүлгөн.
"Документ боюнча кафе төрт сотыхты ээлейт, ал эми факты боюнча 11 сотых. Муну менен алар муниципалдык аймакты ээлеп алышкан. Учурда имараттын эки кабаттуу кошумча курулушу түрттүрүлүп жатат", — деп айтты башкармалыктын жетекчиси.
Ал түрттүрүү иштери бүгүн башталып, бир нече күнгө созуларын билдирди. Андан сырткары, Бишкек шаардык №1 ооруканасынын корпусун түрттүрүшөт. Имарат өткөн жылдын 30-жылдары курулуп, эскилиги жеткен.