БИШКЕК, 2-апр.— Sputnik. Айсулуу Тыныбекова азырынча турмушка чыкпайт. Бул тууралуу анын машыктыруучусу Нурбек Изабеков билдирди.
"2020-жылы өтө турган Олимпиада оюндары жылдырылгандыктан, мен турмушка чыкканы жатам. Ал адам балбан эмес. Мени бардык тараптан колдойт деп ойлойм. Коронавируска байланыштуу үлпөт той болбойт", — деп жазган Тыныбекова.
Анын машыктыруучусу Нурбек Изабековдун айтымында, бул жөн гана тамаша. Спортчу азыр турмушка чыкпайт.
"1-апрелге карата тамашалап жазып койсо керек. Турмушка чыга турган болсо мен биринчи укмакмын. Азыр күйөөгө кетпейт го", — деди Изабеков.
Буга чейин спортчу кыздын машыктыруучусу Sputnik Кыргызстан агенттигине берген маегинде: "Айсулуу Рио Олимпиадасында медаль алып калса, өзү каалаган адамга турмушка чыгып, кайра бир-эки жылдан кийин спортко кайтып келмек", - деп айткан эле.
Айсулуу Тыныбекова кыз-келиндер арасындагы эркин күрөш боюнча эл аралык класстагы чебер, КРдин көп жолку чемпиону.
