БИШКЕК, 1-мар. — Sputnik. 2-3-мартта мезгил-мезгили менен жаан, тоо этектеринде катуу кар жаашы күтүлөт. Бул тууралуу Кыргызгидрометтен билдирди.
Өрөөндөрдө зымдарга жана бактарга суу кар жармашат. Жолдор тайгак жана тоңголок болуп, тоолуу аймактарда кар күрткүсү күтүлөт. Батыштан соккон шамалдын ылдамдыгы секундасына 15-20 метрге жетиши күтүлөт.
Чүй, Талас өрөөндөрүндө түнкүсүн —4…-9 градус суук, күндүз —2 градус сууктан…+3 градуска чейин жылуу, Ош, Жалал-Абад, Баткен облустарынын дыйканчылык аймактарында түнкүсүн —2…-7 градус суук, күндүз 0…5 градус жылуу, Ысык-Көл ойдуңунда түнкүсүн —4…-9 градус суук, күндүз —3 градус сууктан…+2 градуска чейин жылыйт. Нарын облусунун дыйканчылык аймактарында жана тоолуу райондордо түнкүсүн —18…-23 градус суук, күндүз —1…-6 градус суук болушу күтүлөт.
Мындай туруксуз аба ырайы автоунаа, энергетика жана коммуналдык кызматтардын ишин кыйындатат.
