Амир менен нөөмөтчүнүн сүйлөшүүсү. ӨКМ издөө хронологиясын жарыялады
© Фото / пресс-служба МЧС КР
Жазылуу
БИШКЕК, 10-ноя. — Sputnik. "Ала-Арча" капчыгайында каза тапкан 14 жаштагы Амир ӨКМдин нөөмөтчүсү менен эмне тууралуу сүйлөшкөнү жана издөө иштери кандай жүргүзүлгөнү белгилүү болду. Бул тууралуу өзгөчө кырдаалдар министринин орун басары Алмазбек Асанов билдирди.
Асановдун айтымында, өспүрүм 7-ноябрда саат 19:02де 112 номерине байланышка чыгып, жардам сураган жана болжолдуу координаттарын айткан.
"Андан кийин нөөмөтчү аны менен кайра байланышкан. Өспүрүм болжолдуу координаттарын кабарлаган. Бул „Электро“ чокусунун аймагы болчу. Телефонунун кубатын сурашканда, 2–3 пайызы гана калганын жана жанында кол чырагы жок экенин билдирген. Ага интернетин өчүрүп коюуну, жакын арада куткаруучулар жолго чыгарын айтышкан", — деди министрдин орун басары.
Андан соң ал издөө иштеринин жүрүшүнүн хронологиясын айтып берди:
Ала-Арчада куткаруучулар дайыма нөөмөттө турушат. Маалымат түшкөн маалда алар башка бир кызды куткарууга бара жатышкан. Билдирүү келери менен топ экиге бөлүнүп, эки куткаруучу кызга, үчөө Амирди издөөгө жөнөгөн;
Куткаруучулар Рацек тоо бекетинен өспүрүм жоголгон жерге чейин түшүшү керек болчу. Бул болжол менен 15–18 чакырымды түзүп, ага кеминде 4–5 саат талап кылынмак. Бул — тоодо иштөөгө атайын даярдалган тажрыйбалуу топ болгон. ӨКМде башка да куткаруучулар бар, бирок эсеп боюнча алар да болжол менен ушундай эле убакытта жетип барышмак;
Куткаруучулар жерине түн ичинде жетип, аймакты кыдырып издей башташкан. Алар түнү бою издөө жүргүзүп, таң аткандан кийин да жумуштар уланган. Ал убакта өспүрүмдүн телефону өчүп калгандыктан, тегеректеги бардык аймак карала баштаган. 8-ноябрда издөөгө ыктыярчылар менен туристтер кошулган;
9-ноябрдын таңында издегендердин саны көбөйүп, дрондор колдонулган. Министрдин буйругу менен тик учак да көтөрүлүп, аймак дүрбү менен каралган. Төмөн түшүүгө катуу шамал жана тик учактын техникалык чектөөлөрү тоскоол болгондуктан, буга карабай аймакты үч ирет айланып чыгышкан;
Ошол эле күнү саат 16:00 чамасында өспүрүмдүн сөөгү табылган.
