Чийки затты экспорттоп, жумушчу күчүн сыртка чыгарган Ош экономикасы
19:05 19.10.2026 (Жаңыртылды: 09:40 20.10.2026)
© Фото / Асел Сыдыкова
Жазылуу
Ош облусунун географиялык жайгашуусу — анын эң чоң артыкчылыктарынын бири. Коңшу Өзбекстандын Фергана, Кокон, Анжиян сыяктуу калкы жыш жайгашкан шаарлары менен жакын болушу аймак үчүн чоң рынокту ачат.
Экономист-изилдөөчү Улукман Мамытов “Экономикалык панорама” уктуруусунда Ош облусунун ички дүң продукциясынын көлөмү 100 миллиард сомду түзөрүн, бул көрсөткүч калкы көп жана экономикалык мүмкүнчүлүктөрү кең аймак үчүн төмөн экенин айтты.
Белгилей кетсек, Ош облусунун калкынын саны бир миллион 450 миңге жакын. Бул — өндүрүлгөн товарларды сатуу үчүн чоң мүмкүнчүлүк. Мамытов аймак өзүнүн экономикалык потенциалын толук пайдалана албай жатканын белгиледи. Анын айтымында, облус калкынын басымдуу бөлүгү айыл жеринде жашайт. Климаты айыл чарбасын өнүктүрүүгө ыңгайлуу болгондуктан, көпчүлүк дыйканчылык менен алектенет.
"Кара-Суу" базары жана башка ири соода борборлору түштүк аймактын экономикасында маанилүү орунду ээлейт. Бирок экономиканын олуттуу бөлүгү көмүскөдө калып, каражат толук расмий жүгүртүүгө тартылбай жатат. Чет өлкөлөрдө иштеген мигранттардын саны көп, алар өлкөгө ири көлөмдө акча которушат. Демек, бул каражатты көмүскөдөн чыгарып, өндүрүшкө, ишкерликке жана инвестициялык долбоорлорго багыттоо зарыл. Айыл чарбасында продукция бир топ өндүрүлгөнү менен анын басымдуу бөлүгү чийки зат түрүндө экспорттолот. Кайра иштетүү тармагын өнүктүрүү аркылуу продукциянын кошумча наркын жогорулатып, жергиликтүү экономикада көбүрөөк киреше калтырууга болот. 2025-жылы өкмөттөн аймакка 11 миллиард сом бөлүнүп, анын 8,5 миллиарды социалдык объектилерге жумшалган. Албетте, социалдык инфраструктурага каражат бөлүү маанилүү. Бирок аймакка туруктуу киреше алып келе турган, өндүрүштү өнүктүрүп, жаңы жумуш орундарын түзө турган тармактарга да инвестиция салуу зарыл. Мындай мүмкүнчүлүктөр жетишсиз болгондуктан, эмгек миграциясы күч алууда. Бүгүнкү күндө Ош облусунун экономикасы негизинен базар соодасына таянган деңгээлде. Жаңы базарларды куруу менен эле экономикалык түзүмдү өзгөртүү мүмкүн эмес”, — деди Мамытов.
Ал заманбап технологияларды киргизүү, логистикалык системаларды өнүктүрүү, экспорт-импорт иштерин алып барган компанияларды түзүү зарылдыган кошумчалады.
