"Түшүнүп турам, тыгын, ызы-чуу болот". Бишкектин мэри шаардыктарга кайрылды
10:30 29.08.2025 (Жаңыртылды: 16:45 09.09.2025)
Жазылуу
БИШКЕК, 29-авг. — Sputnik. Бишкектин мэри Айбек Жунушалиев окуу жылы башталып жатканда көчөлөр эмнеге казылып, автотыгын, чаң болуп ыңгайсыздык жаратып жатканына түшүндүрмө берди.
Калаа башчысы Бишкектеги азыркы инфраструктура 400 миң кишиге ылайыкталганын, бирок ушу тапта миллиондон ашык адам жашай турганын белгиледи. Эгер бул инфраструктура жаңыртылбаса беш жылдан кийин шаарда транспорттук жана коммуналдык болуп көрбөгөндөй көйгөй жаралышы ыктымалдыгын билдирген.
Калаа башчысынын айткандарынын маанилүү учурлары:
быйыл жалпы 98 чакырым жол оңдолуп, курулууда;
айрым жолдорду оңдобой коюу мүмкүн эмес. Мисалы, Жибек Жолу проспектиндеги "Аламүдүн" базарынын тушу 23 жылдан бери асфальт көрө элек. Медеров көчөсү 15 жылдан бери жасала элек болсо, Токтоналиев көчөсүндө асфальт такыр жок болгон;
калаага кире берген жердеги Калинин көчөсү төрт тилкелүү болуп кеңейтилип, Жаш гвардия — Лев Толстой көчөлөрүнүн кесишинде транспорттук түйүн курулмакчы. Ал эми Жибек Жолу, Ауэзов жана Шүкүров көчөлөрүндө үч жаңы көпүрө салынууда;
курулган жолдорду кайра казбоо үчүн жер астындагы суу жана башка түтүктөр алмаштырылууда;
суу жана жылуулук түтүктөрүнүн 65 пайызы эскирген. Фрунзе жана Курманжан датка көчөлөрүндө 2,5 чакырымдан ашык жылуулук, 1,5 чакырым канализация түтүктөрү жаңыртылды;
кыйылган дарактардын 85 пайызы карыган. Алардын ордуна мурдагысынан 7-10 эсе көп көчөт отургузулууда. Быйыл 7 миң 615 көчөт тигилип, тамчылатып сугаруу системасы киргизилүүдө;
азыркы жасалып жаткан жумуштун баары 2030-жылга чейинки түзүлгөн пландын алкагында өзүнүн ырааты, убакыт-сааты менен жасалууда.
"Түшүнүп турам, тыгын, ызы-чуу болот, чаңдайт. Бирок азыр чыдап, сабыр кылып койбосок, бул келечекте чоң көйгөйгө айланат. Андыктан түшүнүү менен кабыл алышыңыздарды өтүнөм," — деген Жунушалиев шаардыктарга кайрылып.
