Минкаб төрагасы өлкө бийлигинин алдында турган ири милдеттерди атады
10:32 07.06.2025 (Жаңыртылды: 10:33 07.06.2025)
© Фото / пресс-служба кабинета министров КР / Эргеш Жусубалиев
Жазылуу
БИШКЕК, 7-июн. — Sputnik. 2030-жылга чейин өлкө ИДПсын 3 триллион сомдон ашыруу пландалууда. Бул тууралуу министрлер кабинетинин төрагасы Адылбек Касымалиевдин финансы жана экономика кызматкерлерин кесиптик майрамы менен куттуктоосунда белгиленген.
Анын айтымында, дүйнөлүк экономиканын учурдагы турбуленттүү абалына карабастан Кыргызстандын экономикасы оң динамиканы көрсөтүүдө.
“Былтыр ИДП 9 пайызга, экспорт 13 пайызга өстү. Чет өлкөлүк инвестициялардын көлөмү 872,6 миллион доллардан ашты. Консолидацияланган бюджет акыркы үч жылда 688,5 миллиард сомго чейин өстү. 2030-жылга чейин ИДПны 30 миллиард долларга, сом менен айтканда үч триллиондун деңгээлинен ашырабыз деп пландап жатабыз. Бүгүнкү күндө өлкө ИДПсы 2025-жылдын төрт айынын жыйынтыгы боюнча 11,7 пайыздык өсүштү көрсөттү”, — деди Касымалиев.
Ал белгилегендей, салык жана бажы тармагы санариптештирилип, фискалдык саясаттын ачык-айкындуулугу жогорулады. Өндүрүштө, туризм тармагында да оң жылыштар байкалууда.
“Өткөн жылы Кыргызстанга 8,6 миллиондон ашык турист келип, түшкөн киреше 20 пайызга өстү. Жаңы маршруттар, экотуризм объектилери жигердүү өнүгүүдө, өлкөнүн туристтик брендин эл аралык деңгээлде илгерилетүү күчөтүлүүдө. Туризм региондук өнүгүүнүн жана калкты иш менен камсыз кылуунун маанилүү драйверине айланууда. Өлкөнүн эл аралык кредиттик рейтинги жакшырды. Индустриялаштыруу, “жашыл” экономикага өтүү, экспорттук жана туристтик потенциалды андан ары өнүктүрүү, санариптештирүү жана аймактарды туруктуу өнүктүрүү сыяктуу масштабдуу милдеттер турат”, — деди Касымалиев.
Ошондой эле өкмөт башчы экономист, финансисттерди кесиптик майрамы менен куттуктап, жакшы тилектерин арнаган.
