Молдогазиева: өлкөдө реабилитациялык борборлордун аздыгы көйгөй жаратууда
© Sputnik / Арууке Амирдинова
Жазылуу
Эмгек, социалдык камсыздоо жана миграция министрлигинин майыптыгы бар адамдарга жана улгайган жарандарга карата чечимдерди даярдоо башкармалыгынын жетектөөчү адиси Айнура Молдогазиева мүмкүнчүлүгү чектелген балдарга мамлекет тарабынан түзүлгөн шарт тууралуу айтып берди.
Жыл өткөн сайын майыптыгы бар адамдардын саны өсүүдө. Бул тууралуу Айнура Молдогазиева Sputnik Кыргызстан радиосунун эфиринде маек куруп жатып билдирди.
Молдогазиева: өлкөдө реабилитациялык борборлордун аздыгы көйгөй жаратууда
Анын айтымында, учурда республика боюнча майыптыгы бар адамдардын жалпы саны 218 миңди түзсө, анын ичинен 37 миңден ашыгы — балдар.
"Майыптыкты алдын алуу боюнча коомдогу мүмкүнчүлүгү чектелген адамдарды социалдык жактан адаптациялоого шарттаган ар кандай социалдык программалар бар. Мисалы, Кыргызстан БУУнун Майыптыгы бар адамдардын укуктары тууралуу конвенциясын 2019-жылы ратификациялаган. Андан соң бизде "жеткиликтүү өлкө" мамлекеттик программасы иштелип чыккан. Алты багыттан турган бул программада инфраструктуранын жеткиликтүүлүгү, медициналык-социалдык жактан баалоо тутумун оптималдаштыруу, реабилитация-обилитация, жеткиликтүү билим берүү, жеткиликтүү эмгек рыногу, протездик-ортопедиялык кызмат көрсөтүү системасын модернизациялоо камтылган. Ошондой эле майыптыгы бар адамдарга реабилитиция жана обилитация кылуу сыяктуу артыкчылыктуу багыттын бири болгон программа иштелип жатат. Ал үч министрликтин ортосунда (Эмгек, социалдык камсыздандыруу жана миграция, Билим берүү жана Саламаттык сактоо министрликтеринин) атайын буйрук менен бекитилген, жакында администрацияга жөнөтүлөт", — деди Молдогазиева.
Ал өлкөдө реабилитациялык борборлордун аздыгы чоң көйгөйлөрдү жаратып жатканын белгиледи.
"Министрликтин алдында "Келечек" балдарды реабилитациялоо борбору бар. Ага республиканын аймактарынан майыптыгы бар балдар келип, атайын графиктин негизинде бир же эки ай адистердин кызматын ала алышат. Жардам бере турган мындай борборлор көбүрөөк болушу керек эле, ушул нерсе азыр көйгөй болуп турат", — деди министрликтин өкүлү.
Ал обилитациянын мааниси бул майыптык алган жарандарын мүмкүнчүлүктөрүн, ишке жөндөмдүүлүгүн калыбына келтирүү боюнча иш жүргүзүү экенин кошумчалады.
