Каарова: кыргыздын оюм-чийимин изилдөөгө өмүрүмдү багыштадым
© Sputnik / Кенжебай Сатканалиев
Жазылуу
"Кеште" мода үйүнүн жетекчиси, дизайнер Назгүл Каарова ар бир уздун өзүнүн өзгөчөлүгү, кол жазмасы бар экенин билдирди.
Этностилдеги кийимдерди тигүүдө кыргыз оюм-чийимдеринин нукуралыгын жоготпой учур менен айкалыштыруу жогорку чеберчиликти талап кылат. Бул тууралуу Назгүл Каарова Sputnik Кыргызстан радиосуна маек куруп жатып билдирди.
Анын айтымында, кыргыз улуттук кийимдерин изилдеп жана аны мезгил демине айлантууга аракеттенип келе жатканына 20 жылга чукулдап калды.
"Кыргыздын оюм-чийимдерин кандай болсо ошол боюнча жармаштырып койгондо баарыбыз окшошуп, айырмабыз болбойт. Ар бир бренддин өзүнүн өзгөчөлүгү, кол жазмасы болушу керек. Албетте, "Кештенин" дагы өзүнүн өзгөчөлүгү бар. Ал көп жылдык изилдөөнүн, тажырыйбанын натыйжасында пайда болду. Менин дипломдук ишимдин аталышы "Кыргыз улуттук кийимдерин изилдөө жана аны заманбап кылып чыгаруу" болчу. Аны улантып, кыргыз кийимдерин, үрп-адатын, дегеле кыргыз жыттанган нерсенин баарын жакшы көрүп, урматтап, өмүрүмдү багыштайм деп чечим чыгаргам. Окуу жайды аяктаганыма 18 жыл болду. Дал ушул аралыкта улуттук оймо-чиймелерди изилдеп, анын өзгөчөлөгүн жоготпой учур менен айкалыштырып, өзгөчө нерсе жаратууга аракет кылып келем", — деди Каарова.
Ал ошондой эле "кеште" деген сөз байыркы кыргыз сөзү экенин, "кооздолгон сайма" дегенди түшүндүрөрүн кошумчалады.
