Мусуралиев: акчаны туура пайдаланса насыяга муктаждык жаралбайт
© Sputnik / Арууке Амирдинова
Жазылуу
Улуттук банктын финансылык сабаттуулук боюнча тобунун жетекчиси Кубаныч Мусуралиев бүгүнкү күндө керектөөчү насыялар кеңири тарап жатканын маалымдады.
Кредиттик рынок өлкөдө жыл сайын кеңейип жатат. Ушул жылдын башында берилген кредиттердин жалпы көлөмү 347 миллиард сомдон ашты. Бул тууралуу Кубаныч Мусуралиев Sputnik Кыргызстан радиосунун эфиринде маек куруп жатып билдирди.
Мусуралиев: акчаны туура пайдаланса насыяга муктаждык жаралбайт
Мусуралиев: акчаны туура пайдаланса насыяга муктаждык жаралбайт
Анын айтымында, насыя алуучулардын саны 1,5 миллионду түзүп, ар бир экинчи жаран каржылык жардам алган.
"Кредиттер максаттарга жана кыялдарга жетүүнү тездетип, көйгөйдү бат чечкендиктен, учурда аларга болгон муктаждык жогору. Бүгүнкү күндө айыл чарбасына 45 миллиард сом, өнөр жайга 8 миллиард сом кредит берилген. Ошондой эле транспорт, байланыш, сатуу, курулуш, ипотека үчүн да карызга акча алышкан. Эң көп сумма керектөөчү насыяларга (103 млрд сом) багытталган. Көпчүлүк тиричилик буюмдары үчүн алышкан. Арасында каражатты максатсыз алып, керексиз нерселерге короткондору да бар. Эксперттер насыяны той өткөрүүгө албай эле коюу керектигин айтып келишет. Анткени той кеткен чыгымды актабай калышы ыктымал. Негизинен кредит алуу тууралуу чечим кабыл алардан мурда анын керектигине, муктаждыгына жана өз убагында төлөө мүмкүнчүлүгүнө көңүл буруу зарыл. Мында финансылык сабаттуулукту жогорулатуу дагы маанилүү. Бюджетти туура бөлүштүрүүнү жана акча башкарууну, топтоону үйрөнсөк, насыяга муктаждык жаралбайт", — деди Мусуралиев.
Ал ошондой эле тапкан кирешенин 20 пайызын жыйнап турууну жана алынган насыяны туура пайдалануу керектигин кошумчалады.
