Жунушбаева: Кыргызстанда ата мекендик өндүрүштү камкордукка алуу маселеси бар
© Sputnik / Кенжебай Сатканалиев
Жазылуу
Sky Elevator заводунун жетекчиси Рахат Жунушбаева ата мекендик өндүрүштүн абалы, көйгөйлөрү тууралуу айтты.
Көмүскө экономикадан чыгаруу үчүн Кыргызстанга кирип жаткан продукциялардын баары ЭТТНден өтүшү туура. Бул тууралуу Рахат Жунушбаева Sputnik Кыргызстан радиосунун эфиринде маек куруп жатып билдирди.
Жунушбаева: Кыргызстанда ата мекендик өндүрүштү камкордукка алуу маселеси бар
Анын айтымында, мамлекет өлкөдө кайсы өндүрүш жолго коюлса анын импортуна тыюу салып, протекция түзүп бериши зарыл.
"Азыр өкмөт өнөр жайды индустриялаштыруу жаатында көптөгөн иштерди кылганы менен бул да жетишсиз болууда. Азырынча кылынып жаткан иштердин майнабын көрө элекпиз. Ата мекендик өндүрүштү мамлекеттик органдар эч кандай сынагы жок алышы керектиги боюнча жарлык чыккан. Ал иштеп жатканы менен 100 пайыз аткарылган жок. Кааласа алышат, каалабаса албай деле коюшат. Бул жерде кеп мамлекеттик органдардын жетекчилеринин мекенчилдик сезимине жараша болуп калууда. Жарлыктын аткарылышы көзөмөлгө алынса жакшы болмок. Экинчиден, ата мекендик өндүрүштү жана өндүрүшчүлөрдү коргоо маселеси бар. Алыс барбай коңшу Өзбекстанды алсак, эгер кайсы бир продукция Өзбекстандан чыгып жатса, аны сырттан алып келүүгө тыюу салып коюшат. Мына жакында эле Өзбекстанда лифт чыгаруучу завод салынды. Азыр Өзбекстанда лифт импорту жок. Президенттин жарлыгы менен кайсы бир өндүрүштү баштаса, ага мыйзам менен толук протекция түзүп берип жатышат. Бизде андай жок. Ишкерлер импорт менен атаандашууга аргасыз болуп жатабыз. Үчүнчүдөн, салыктык преференция. Өндүрүштө салынган каражатты кайра чыгарып алууга 3 жылдан 5 жылга чейин убакыт кетет. Ошол беш жылга чейин бизди салыктан бошотуп берсе жакшы болмок. Ушул убакка чейин преференция ала элекпиз. Ошондой эле контрабанда менен келген өндүрүштөр салык төлөбөгөндүктөн бизден чыккан продукцияга караганда арзаныраак болуп калып жатат. Контрабанда — ата мекендик өндүрүштүн биринчи душманы. Ошондуктан аткезчилик толук көзөмөлгө алынып, аны жабуу кажет," — деди Жунушбаева.
Ал Мамлекеттик ипотекалык компания аркылуу мамлекеттин колдоосу заводго дем бергенин кошумчалады.
