Транспорт министрлиги Эсеп палатасынын мыйзам бузду дегенине жооп берди
Жазылуу
БИШКЕК, 9-дек. — Sputnik. Транспорт жана коммуникациялар министрлиги Эсеп палатасынын 5,7 миллиард сом өлчөмүндө аныкталган каржылык мыйзам бузуу боюнча билдирүүсүнө жооп кайтарды.
Маалымат кызматы төмөнкүлөрдү билдирди:
Бишкекке автобустарды калаа мэриясы сатып алган. Финансы министрлиги менен муниципалитеттин кайрылуусунан кийин Транспорт министрлиги тарабынан 211,6 миллион сомдук бажы төлөмдөрү төлөнгөн. Бул сумма 2023-жылдын республикалык бюджетинде каралган;
министрлер кабинетинин буйругуна жана "Кыргыз темир жолу" мамлекеттик ишканасы менен "Кытай темир жол курулуш корпорациясынын биринчи долбоорлоо институтунун" ортосундагы келишимге ылайык, Транспорт министрлиги Кытай — Кыргызстан — Өзбекстан темир жолунун курулушунун техникалык-экономикалык негиздемесин иштеп чыгышы үчүн республикалык бюджеттен 536,5 миллион сом бөлгөн. Документ 2023-жылдын аягында даярдалган. 2024-жылдын июль айында үч өлкөнүн ортосунда үч тараптуу келишимге кол коюлган;
асфальт-бетон төшөө жана министрликтин балансына кирбеген жергиликтүү маанидеги жолдорду каржылоо Финансы министрлиги бекиткен оңдоо-курулуш объектилеринин тизмесине ылайык ишке ашырылган;
Жол фондунун эсебинен үч жылдык лизинг шартында (бажы төлөмдөрүн кошкондо) 2,5 миллиард сомго 265 даана жол курулуш техникасы жана жабдуулар сатып алынган. Анын ичинен 1,2 миллиард сом төлөнгөн;
машиналарды жана жабдууларды сатып алуу эрежелерге ылайык жүзөгө ашырылган. Мында уставдык капиталдагы үлүштүн 50 жана андан ашык пайызы мамлекетке, анын ичинде туунду компанияларга таандык. Бардык техника жана жабдуулар бажылык тариздөөдөн өтүп, "Унаа" мамлекеттик ишканасы каттаган. Ошондой эле техникалык паспорттор алынып, "Кыргызавтожол" мамлекеттик ишканасынын балансына коюлган;
Бишкек — Ош унаа жолунун 660-чакырымындагы жол тилкеге асфальт-бетон төшөө үчүн жарыяланган сынакта "Вега-Строй ЛТД" ишканасы жеңүүчү деп табылган. Баштапкы бюджет катары 46 миллион 626,3 миң сом белгиленип, бирок чыгымды эсептөөдө техникалык ката кеткендиктен сынак токтотулган. Кайра өткөн сынактын жүрүшүндө бюджет 47 миллион 757,1 миң сом өлчөмүндө аныкталган. Натыйжада ишти 46,5 миллион сомго бүтүрүп берүүнү сунуштаган "Вега-Строй ЛТД" компаниясы жеңүүчү деп табылган. Бул баштапкы суммадан төмөн. Ошентсе да Эсеп палатасы так сумманы эмес, биринчи жана экинчи сынактын ортосундагы бюджеттин айырмасын көрсөтүүдө. Аткарылбаган иш үчүн компанияга эч кандай акы төлөнгөн эмес;
Жол фондунда 969,7 миллион сом пайдаланылбаганы көрсөтүлгөн. Бюджеттик кодекске ылайык, фонддун каражаттары республикалык бюджетте топтолот жана ошол жактан каржыланат. Бул сумма иш жүзүндө түшкөн акча менен каржылоонун ортосундагы айырма болуп саналат. 29,1 миллион сом "Жол фонду жөнүндө" мыйзамга ылайык пайдаланылган.
