Президент түнкү тыныгуунун мөөнөтүн аныктаган мыйзамга кол койду. Түшүндүрмө
© Sputnik / Владимир Астапкович
/ Жазылуу
БИШКЕК, 7-дек. — Sputnik. Президент Садыр Жапаров түнкү эс алуу, тыныгуунун мезгилин аныктаган мыйзамга кол койду.
Аны Жогорку Кеңеш 23-октябрда кабыл алган.
Бул эл уктап, эс алып жатканда тынчын албоого, уйкусун бузбоого багытталган документ.
Анда турак үйлөрдө, эс алуу зоналарында, коомдук жайларда иш күндөрү саат 22:00дөн 07:00гө, дем алыш жана майрам күндөрү 22:00дөн 09:00гө чейин катуу, ашыкча добуштарды чыгарбоо керектиги айтылган. Тагыраагы, музыка жана башка ызы-чуунун үндөрү атайын белгиленген деңгээлден ашпашы керек.
Жашоочулардын тынчын алуу төмөнкү учурларда болору айтылган:
телевизорлорду, радиокабылдагычтарды жана башка үндү кайталап (күчөтүп) чыгаруучу аппараттарды, ошондой эле үндөрдүн, добуштардын басымынын жана ызы-чуунун жол берилген (коюлган чегинен) деңгээлинен ашкан үндү күчөтүүчү техникаларды, анын ичинде транспорт каражаттарында, соода объектилеринде, көңүл ачуучу жана оюн-зоок жайларында жана коомдук тамактануу жайларда орнотулган аппараттарды пайдаланганда;
музыкалык аспаптарда ойногондо, ышкырганда, ырдаганда, ошондой эле катуу добуштардын, ызы-чуу үндөрдү жол берилген деңгээлинен ашырганда;
тартип бузуучулар иштеткен күзөт, транспорт каражаттарынын сигнализациясынын үн чыгаруусун өчүрүү боюнча өз убагында чара көрбөгөндө, транспорт каражатынын сигналдарын зарыл болбосо да пайдаланганда, эс алуу учурунда тынчтыкты бузган ызы-чуулу, тарсылдаган үндөрдү чыгарганда;
пиротехникалык каражаттарды пайдаланганда;
адамдардын эс алуу учурунда тынчтыгын бузууга алып келген оңдоп-түзөө, жүк түшүрүү-жүктөө, тазалоо жана башка иштердин түрлөрүн жүргүзгөнгө, механикалык каражаттарды жана техникалык каражаттарды иштеткенде;
белгиленген убакытта корголууга тийиш болгон аймактарда, жайларда жарандардын тынчтыгын жана бейпилдигин бузууга алып келген башка аракеттерди жасаганда түнкү тыныгууну бузгандык деп эсептелет.
