Президент Батышты Афганстандын тоңдурулган акчасын кайтарып берүүгө чакырды
14:36 07.12.2024 (Жаңыртылды: 16:35 07.12.2024)
© Фото / пресс-служба президента КР
Жазылуу
БИШКЕК, 7-дек. — Sputnik. Европа менен АКШны талибдердин бийлигин таанууга, алардын тоңдурулган акчасын кайтарып берүүгө чакырам. Бул тууралуу президент Садыр Жапаров TRT AVAZ телеканалына берген маегинде айтты.
Ал материалда Афганстандагы абал жана аны жакшыртуу үчүн көрүлө турган чаралар боюнча айтып берген.
Президент Садыр Жапаровдун маегинин урунтуу учурлары:
афган эли узак жылдар бою согуш жана анын кесепеттеринен жапа чегип, кыйналып келет;
Афганстан кошуна өлкөлөр менен чектешкендиктен ал жактагы абалдын курчушу кайсыл бир деңгээлде Кыргызстаны дагы тынчсыздандырат;
2021-жылы Афганстанда бийликке "Талибан"* кыймылы келип, башкарууда. Муну эч ким тана албайт. Бир катар өлкөлөр, анын ичинде Кыргызстан дагы "Талибанды"* тыюу салынган уюм тизмесинен чыгарды. Ошондой эле бир нече жолу гуманитардык жардам жөнөттү;
Афганстандын 9,4 млрд доллары батыш өлкөлөрүндө тоңдурулган (эсептен чыгарууга туюу салынган — ред.). Бул каражатты Афганстандагы кырдаалды жакшыртуу үчүн тез арада кайтаруу зарыл. Учурдан пайдаланы Европа жана АКШ жетекчилигин Афганстандын азыркы бийлигин таанууга, тоңдурулган акчаларын кайтарып берүүгө чакырам;
Батыш өлкөлөрү Афганстанга атайын программалар аркылуу техникалык жардам бере турган болсо, биз аны ишке ашырууга даярбыз. Мисалы Кыргызстан афган студенттерин окутууга даяр;
Талибдер* билим алууга жана адам укуктарын урматтоого кызыкдар. Диалог аркылуу гана Афганстандын өкмөтү менен мамилелерди жакшыртууга болот.
*БУУнун санкцияларына тушуккан
