Ашымалиева: ЕАЭБде бирдиктүү пенсия ошол өлкөнүн улуттук валютасында төлөнөт
© Sputnik / Кенжебай Сатканалиев
Жазылуу
Социалдык фонддун пенсия чектөө жана кайра эсептөө башкармалыгынын башчысы Бактыгүл Ашымалиева ЕАЭБге мүчө мамлекеттердин жарандарынын бирдиктүү пенсияга чыгуу эрежелерине токтолду.
2021-жылдын январь айынан тартып Евразия экономикалык биримдигине мүчө мамлекеттердин эмгекчилерине беш өлкөдө тең пенсияга чыгууга мүмкүнчүлүк түзгөн мыйзам иштеп келет. Анын алкагында пенсияга чыгуу эрежелери жаран кайсы мамлекеттен пенсияга чыгып жатса, ошол өлкөнүн улуттук мыйзамдарынын негизинде иштейт. Бул тууралуу Бактыгүл Ашымалиева Sputnik Кыргызстан радиосуна маек куруп жатып билдирди.
Ашымалиева: ЕАЭБде бирдиктүү пенсия ошол өлкөнүн улуттук валютасында төлөнөт
Анын айтымында, камсыздандыруу стажы ар өлкөдө ар кандай болгону менен жетпей калган учурда уюмга мүчө башка мамлекеттерде иштеген жылдары да кошулуп, эсептелет.
"ЕАЭБ алкагында бирдиктүү пенсия системасынан уюмга мүчө беш мамлекетте расмий иштеген адамдар колдоно алат. Эгер жаран Армения, Беларусь, Россия Федерациясы, Казакстан же Кыргызстанда расмий ишке орношуп 12 айдан кем эмес иштеп кеткен болсо, ал эмгек стажына кошулат. Кайсы өлкөдө пенсияга чыгуу үчүн документ тапшырып жатса, ошол мамлекеттин улуттук мыйзамдарынын негизинде иш жүрөт. Мисалы, беш өлкөдө пенсияга чыгууда ички мыйзамдарда айырмачылыктар бар. Бирок ошол мамлекетте иштеген камсыздандыруу стажы жетпей калган учурда уюмга мүчө башка мамлекеттердеги иштеген жылдары эсепке алынат. Ошондой эле акчасын пенсияга чыгып жаткан мамлекетинин улуттук валютасы менен алат. Эгер өзү жашаган эмес, пенсияга чыгып жаткан экинчи мамлекеттин валютасында алам десе атайын арыз менен кайрылышы керек болот. Азыркы учурда Кыргызстан тарап жалпысынан ЕАЭБге мүчө беш мамлекеттин 73 жаранына пенсия төлөөдө. Анын 64ү Россиянын жарандары, сегизи казакстандыктар, бирөө Беларусь жараны. Бул пенсиянын орточо көлөмү 1 695 сомду түзөт. Ал эми Россия Федерациясы тарабынан учурда 47 кыргызстандык пенсиясынын ошол жакта иштеп кеткен бөлүгүн алууда. Бул — пенсиянын орточо көлөмү, сомго айландырганда 794 сом болот", — деди Ашымалиева.
Ал пенсияны которуу квартал сайын жүргүзүлөрүн кошумчалады.
