Күнгө кактанып туруп сууга дароо түшпөңүз. Адистин кеңештери
08:52 07.06.2024 (Жаңыртылды: 09:23 07.06.2024)
© Sputnik / Константин Михальчевский
/ Жазылуу
Адис сууга түшүүдө коопсуздук эрежелерин так сактоону эскертет.
БИШКЕК, 7-июн. — Sputnik. Коопсуздук эрежелери боюнча, сууда сүзүүдө чоң адамдар үчүн тереңдик 170 сантиметр, балдарга 70 сантиметр болушу шарт. Бул тууралуу Өзгөчө кырдаалдар министрлигине караштуу Суучулдар борборунун суу алдындагы техникалык иштерди алып барган адис Айдар Каптагаев билдирди.
Ал жайында сууга түшүү боюнча коопсуздук эрежелерин так сактоону эскертип, эс алуучуларга төмөнкү кеңештерди берди:
эреже боюнча, чоң адамдарга суунун тереңдиги 170 сантиметрден, балдарга 70 сантиметрден ашпашы керек. Ал эми жээктен 50 метр алыстыкка чейин сүзүүгө уруксат берилет, андан алыс аралык өмүргө кооптуу;
эс алуучулардан бөлүнүп, "жапайы пляжда" сууга түшпөңүз. Биринчиден, адам сууга чөккөндө эч ким көрбөй калышы толук ыктымал, экинчиден, мындай жээктерде адатта суунун асты балыр, баткак болуп, адамды тереңге тартып кетет. Капысынан катуу толкун да башталып калышы мүмкүн. Тилекке каршы, "жапайы пляжда" адам чөгүп кетсе, анын сөөгүн издөө иштери суучулдарга да кыйынга турат;
суунун асты катуу таш же кум болушу керек. Балыр, баткак, асты коопсуз экенин билбеген жээкте сууга түшпөңүз;
дене температурасын сууга көндүрүп, көлгө акырындан кирүү зарыл. Көпчүлүк күнгө какталып, ысып турган абалда муздак сууга секирип кетет. Бул учурда тарамыш түйүлүп, кан тамырлар ичкерип, кан коюуланып кетиши мүмкүн. Кээде бул нерсе инфарктка кептейт. Мунун баары сууга чөгүп кетүү коркунучу менен коштолот;
жаш балдар менен эс алып жатсаңыз аларды атынан чакырбай, санын эсептеп туруңуз. Себеби атын атаганда адам адашып, кээ бирин унутуп калышы мүмкүн;
суунун ичинде ойнобоңуз. Кээде күрөшүп же адамдын ийинине чыгып секиргендер бар. Бул кооптуу нерсе. Себеби секирген учурда экинчи адам катуу сокку алып, эсин жоготуп, сууга чөккөндөр болгон.
