Кулманбетов: "Жаңы ысымдар" сыяктуу эл аралык театр фестивалы КМШда жок
© Sputnik / Асель Сыдыкова
Жазылуу
Драматург жана театр таануучу Жаныш Кулманбетов Бишкекте студенттер арасында өтө турган "Жаңы ысымдар" эл аралык театр фестивалы тогузунчу ирет өтүп жатканын айтты.
"Жаңы ысымдар" эл аралык театр фестивалы Бишкек шаарында 16-19-апрель күндөрү уюштурулат. Бул тууралуу Жаныш Кулманбетов Sputnik Кыргызстан радиосуна маек куруп жатып билдирди.
Кулманбетов: "Жаңы ысымдар" сыяктуу эл аралык театр фестивалы КМШда жок
Анын айтымында, аталган фестивалдын идеясы КР эмгек сиңирген артисти Болот Тентимишовго таандык.
"Бул фестиваль жылдан-жылга өнүгүп, акыркы үч жылдан бери эл аралык деӊгээлде өтүп жатат. Ага чейин республикалык иш-чара катары гана уюштурулуп келген. Фестивалды өткөрүү демилгесин КР эмгек сиңирген артисти Болот Тентимишов көтөргөн. Өкмөттүн "Жаңы ысымдар, жаңы мүмкүнчүлүктөр" деген атайын токтому чыгып, долбоор 2016-жылы башталган эле. Ошондон бери жыл сайын өткөрүлүп салттуу фестивалга айланды. Быйылкы эл аралык иш-чарага Кыргызстан, Казакстан, Өзбекстан, Россия жана Азербайжан өлкөлөрүндө театр жаатында билим алып жаткан студенттер жана алардын окутуучулары катышат. Катышуучуларга фестивалда коюлчу чыгармалар боюнча атайын талап жок. Бул окуу процесси болгондуктан бир гана ага туура келе турган мыкты деңгээлдеги чыгармалар, спектаклдер коюлуп, кийинки муунду шыктандырышы керек. Ошондуктан бул жеке эле студенттердин жарышы эмес, бул аларды тарбиялап жаткан мугалимдердин ортосундагы сынак десе болот. Мындай фестиваль КМШ өлкөрүндө дээрлик жок", — деди Кулманбетов.
Ал, мындан тышкары, фестивалдын учурдагы эң башкы максаттарынын бири анын географиясын кеңейтүү экендигин кошумчалады.
