Жаңылыктар. Чыгарылыш 17:00

Жаңылыктар. Чыгарылыш 17:00
Жазылуу
Президент Садыр Жапаров Franklin Templeton глобалдык инвестициялык-финансылык холдингинин башкы инвестициялык директору Манрадж Секхон баштаган делегацияны кабыл алды. Бул тууралуу өлкө башчынын маалымат кызматы кабарлады. Анда мамлекет башчы Кыргызстанда эл аралык каржы уюмдар жана инвесторлор менен кызматташууга өзгөчө көңүл буруларын жана өлкө инвесторлорго жагымдуу шарт түзүүгө умтуларын белгиледи. Жолугушууда Манрадж Секхондун Кыргызстанда Улуттук бакубатчылык фондун түзүү идеясы Садыр Жапаров тарабынан колдоого алынганы белгилүү болду. "Фонддун максаты мамлекеттик ишканаларды башкарууну жакшыртуу, капиталды жана стратегиялык инвестицияларды тартуу, социалдык-экономикалык көрсөткүчтөргө жетишүү болуп саналат. Ал Кыргыз фондулук биржасында жана глобалдык аянтчалардын биринде листингден өткөрүлөт", — деп айтылат маалыматта.
Быйыл өлкөдө 500 чакырым жол куруу пландалып жатканын Транспорт жана коммуникациялар министрлигинин унаа жолдор башкармалыгынын башчысы Абсамат Талантбек уулу Sputnik Кыргызстан агенттигинде өткөн брифингде билдирди. Ага министрликтин 2024-жылга карата пландары тууралуу суроо узатылган. "500 чакырымга чукул жол куруу пландалууда", — деп жооп берди Талантбек уулу. Тактап айтканда Ош — Баткен — Раззаков унаа жолунун 13-чакырымында асфальттын экинчи катмары төшөлүп, тротуар курулат; Ала — Бука — Жаңы-Базар — Кировка автожолунун 40 чакырымдайы жасалат (жолдун узундугу 100 чакырым); Нарын — Баетов жолунун 20 чакырымы оңдолот.
Кыргызстанда айдоочулук күбөлүк алуу үчүн сынакты тапшыра албагандар жыл сайын көбөйүп жатканын "Унаа" мамлекеттик ишканасы билдирди. Маалым болгондой, өткөн жылы курсанттардын 12,1 пайызы гана сынактан өткөн. Мамлекеттик ишкананын статистикасына ылайык, 2022-жылы абитуриенттердин жалпы санынын 18,68 пайызы, 2021-жылы 28,06 пайызы, 2020-жылы 39,86 пайызы, 2019-жылы 29,88 пайызы тесттен өткөн.
2024-жылы жамааттык күчтөр менен биргелешкен машыгууларды уюштуруу жана өткөрүү боюнча алгачкы штабдык сүйлөшүүлөр ЖККУнун штабында өттү. Уюмдун маалымат кызматы билдиргендей, 2024-жылы төмөнкүлөр пландаштырылууда: Кыргызстан — "Биргелешкен аракет-2024", "Издөө-2024" жана "Эшелон-2024" машыгуулары; Казакстан — "Бузулгус бир туугандык-2024"; Тажикстан — "Рубеж-2024".
Сууда сүзүү боюнча улуттук курама команданын мүчөсү Денис Петрашов АКШда өткөн эл аралык мелдештин жеңүүчүсү болду. Бул тууралуу Дене тарбия жана спорт департаментинен билдиришти. Маалыматка ылайык, турнир 11-апрелде Сан-Антонио шаарында өткөн. "Петрашов 62 спортчу катышкан 100 метр аралыкка брасс жарышында 1 мүнөт 0,49 секундда келип финалга чыккан. Финалдык сүзүүдө 59,83 секундалык жыйынтык менен биринчи орунду ээледи", — деп жазылат маалыматта. Белгилей кетсек Денис Петрашов 24 жашта. Ал брасс үлгүсүндө 50, 100, 200 метр аралык боюнча бир нече мелдеште жеңишти камсыздаган.
Жаңылыктар түрмөгү
0