Ынтымактын жылы болсун! Садыр Жапаров элди Нооруз майрамы менен куттуктады
11:03 21.03.2024 (Жаңыртылды: 11:13 21.03.2024)
Жазылуу
Өлкө башчы жазында талыкпай эмгектенүүгө чакырды.
БИШКЕК, 21-мар. — Sputnik. Садыр Жапаров Кыргызстан элин Нооруз майрамы менен куттуктады.
Өлкө башчы ар бир кыргызстандык үчүн бул жыл ийгиликтердин, ар тараптуу жетишкендиктин, өлкөбүз үчүн ынтымактын, экономикалык өсүп-өнүгүүнүн жылы болушун каалады.
Садыр Жапаров Кыргызстан элин Нооруз майрамы менен куттуктады.
Президенттин сөзүнүн урунттуу жерлери:
быйыл ирригациялык курулмаларды оңдоо, айылдарды таза суу менен камсыздоо иштери колго алынат;
өлкөдө ГЭСтердин кубаттуулугун арттыруу, модернизациялоо жаатында бир топ натыйжалар күтүлүүдө. Жакында Бала-Саруу чакан ГЭСи ачылат, Камбар-Ата-1 ГЭСин куруу долбоору быйыл конкреттүү иш-чаралар менен коштолот;
административдик-аймактык реформа аягына чыгат. Дүйнө агымы менен бир агып, биз дагы чоң-чоң шаарларды курушубуз кажет;
мындан ары окуу программасы менен китептердин сапатына, Билим берүү министрлиги сунуштаган "Алтын Казык" мамлекеттик жаңы программанын долбооруна көңүл бурулат. Буга чейинки окуу программасы азыркы муундун талабына жооп бере албай калганын ачык эле айтып коюшубуз керек;
быйыл Кара-Кыргыз автономиялуу облусунун түзүлгөндүгүнүн 100 жылдыгына карата өлкөдө 100 ири объект ачуу мерчемделүүдө.
Жапаров ошондой эле тарыхка кайрылып, бабалардын каны, аталардын жаны менен түптөлгөн эгемендикти, мамлекеттүүлүктү, элдүүлүктү эстен чыгарбоо зарылдыгын айтты.
"Жети акенин улуусу Мойт акенин "Ырыс алды – ынтымак, ынтымагы бар элдин айсыз кара түндө да, асманында күн турат" деген улуу саптарын мисалга тарткым келип турат. Ынтымакты, биримдикти туу туткан көп этностуу өлкөбүзгө кут уяласын", – деди өлкө башчы.
Мындан тышкары, өлкө башчы элди жазында талыкпай эмгектенүүгө чакырды.
"Нооруз майрамында кайсыл тармакта болбосун талбай иштейли. Маңдай тер акмайын максатка жетүү оңой эмес. Ар бир күнү жылга тете жаз жарыш маалында маңдай тер агыза эмгектенели, эмгегибизден баар тапкандай бололу. Ылайым ушул жылыбыз ынтымактын, ырыскынын, берекенин, мол түшүмдүн жылы болсун! Нооруз майрамыңыздар кут болсун!" — деди Жапаров.
