Керимбаев: массалык тикмечиликтен бренд чыгарууга мезгил жетти
© Sputnik / Асель Сыдыкова
Жазылуу
Соода-өнөр жай палатасынын вице-президенти Авазбек Керимбаев кыргыз тикмечилигинин келечегине токтолду.
Азыр кыргыз жеңил өнөр жайы массалык тикмечиликке басым койгон. Ошентсе да кардарларды толук камсыз кылууга мүмкүнчүлүктөрүбүз чектелүү, өтө көп жумушчу күчү жана жогорку сапат талап кылынат. Бул тууралуу Авазбек Керимбаев Sputnik Кыргызстан радиосуна маек куруп жатып билдирди.
Керимбаев: массалык тикмечиликтен бренд чыгарууга мезгил жетти
Анын айтымында, учурда Кыргызстанда тигилген товарлар Россия рыногунун үч пайызын гана камтый алат.
"Бизде негизги кардарлар ЕАЭБге кирген мамлекеттерден. Тактап айтканда, буюртмалар Россия менен Казакстандан келет. Алар ири көлөмдө товар алышат. Ошентсе деле биздин тигүү фабрикаларыбыз алардын сураган көлөмүн толук чыгарып бере албайт. Мисалы, биз учурда Россиянын рыногунун үч пайызын гана камсыздай алабыз. Бул жерде мен Россиядагы кардарлардын баары эле бизден товар алганга кызыкдар деп айтуудан алысмын. Ошентсе да көлөмдү жогорулатуу мүмкүнчүлүгүбүз бар. Ал үчүн эки багытта иштешибиз керек. Биринчиден, тигүүчүлөрдүн саны жетишпейт, экинчиден, сапатты жакшыртуу зарыл. Бирок массалык буюртма менен иштөөдө өтө көп киреше көрүү ыктымалдыгы азыраак. Андыктан жумушчу күч издеп, арзан товарларды тигип чыгара бербей, кыргыз тикмечилигинин брендге айланган кийим-кечелерди жаратууга мезгили келип жетти. Ал үчүн биздин ишкерлердин да, тигүүчүлөрдүн да тажрыйбасы жетиштүү. Техникалык мүмкүнчүлүктөр, суроо-талап жаралса толукталчу маселе. Тикмечилердин квалификациясын жогорулатуу менен биз өзүбүздүн аз сандагы бренддерди рынокко алып чыгышыбыз керек. Массалык түрдөгү жеңил өнөр жайда Кытай сыяктуу мамлекеттерге атаандаш болгонго караганда, өз жолубузду таап, кыргыз жеңил өнөр жайын дүйнөлүк деңгээлге чыгарууда бул туруктуу багыт", — деди Керимбаев.
Ал ошондой эле жумушчу күчүнүн жетишпегенинен учурда биздин ишкерлер Бангладеш сыяктуу башка мамлекеттерде фабрика ачып жатканын кошумчалады.
