Учурда республикадагы мектептердин 85%ында ысык тамак берилүүдө

"Социалдык мекемелердин тамактануу ченемин этап-этабы менен жогорулатуу үчүн 2024-жылга республикалык бюджеттен 999,4 миллиард сом каражат бөлүү каралууда. Мурда окуучуларга ар бир балага күн сайын 7 сом, ал эми тоолуу аймактардагы мектеп окуучуларына 10 сомдон бөлүнчү. Ага таттуу токоч жана сүт чай берилчү. Азыр эми жалпы билим берүү уюмдарынын 1-4-класстарынын окуучуларынын тамактануу ченеми күнүнө ар бир балага 14 сом болуп бекитилди. Андан тышкары, жалпы билим берүүчү мектеп-интернаттарда (санаторийлерден тышкары) – 90 сом, кесиптик-техникалык окуу жайларында (камкорчулукта жана көзөмөлчүлүктө болгон окуучуларды кошкондо) – 60 сом, мектеп жашындагы балдар үчүн санаторийлик типтеги мектеп-интернаттарда — 165 сом, атайын музыка жана искусство орто окуу жайларынын алдындагы мектеп-интернаттарда — 213 сом, орто жана жогорку кесиптик билим берүүчү окуу жайларында окуган жетим балдар үчүн — 100 сом, жетим балдарга, ден соолугунун мүмкүнчүлүктөрү чектелүү адамдарга жана кесиптик башталгыч билим берүүнүн билим берүү уюмдарынын реабилитациялык топторуна — 160 сом, Шералы Сыдыков атындагы Республикалык спорт колледжине — 489 сом, камкорчулукта (көзөмөлчүлүккө) болгон студенттер жана окуучуларга (окуу процессинде) — 60 сом жана олимпиада, кароо-сынак, окуу жыйындары, шоу, мелдеш жана башка иш-чаралардын катышуучулары үчүн 120 сомдон 489 сомго чейин акча каралды. Окуучуларга берилчү тамак-аштын тизмеси Саламаттык сактоо министрлигинин жана Билим берүү министрлигинин адистери тарабынан даярдалат", — деди Кусеинова.