Адистер кыргызстандыктар тузду 3,5 эсе көп колдонорун айтышты
© Sputnik
Жазылуу
Мамлекеттик санитардык-эпидемиологиялык көзөмөл департаментинин санитардык дарыгери Аида Алимбекова кыргызстандыктар тузду 3,5 эсе көп колдонорун айтты.
Туз колдонууну азайтуу жана жугуштуу эмес жүрөк-кан тамыр ооруларын алдын алууну көздөгөн министрлер кабинетинин токтом долбоору коомдук талкууга коюлду. Документте коомдук тамактануу жайларында туз кутучаларын алып салуу каралууда. Ал эми дасторконго кардардын каалоосу боюнча гана туз берилет. Бул тууралуу Аида Алимбекова Sputnik Кыргызстан радиосунун эфиринде маек куруп жатып билдирди.
Адистер кыргызстандыктар тузду 3,5 эсе көп колдонорун айтышты
Анын айтымында, кыргызстандыктар тузду адаттагыдан 3,5 эсе көп колдонот.
"Кыргызстанда көптөгөн өлкөлөрдөй эле жугуштуу эмес оорулар (артериялык гипертония, жүрөктүн ишемиялык оорусу, инсульт, ашыкча салмак жана семирүү, II типтеги кант диабети, шишиктер ж.б. оорулар) калктын эрте көз жумушунун жана майыптуулуктун негизги себеби болуп саналат. Бул республикадагы бардык өлүмдөрдүн 80 пайызын түзөт. Тузду көп колдонуу — жугуштуу эмес ооруларды пайда кылуучу эӊ негизги факторлордун бири. Дүйнөлүк саламаттык сактоо уюму тузду колдонуунун бир күндүк нормасы 5 граммдан ашпашы керектигин, андан ашса адамда оору жараларын эскертет. Бирок изилдөөлөрдүн жыйынтыгына таянсак, кыргызстандыктар тузду адаттагыдан 3,5 эсе көп колдонот. Столдун үстүндө туз турса аны тамакка кошуу айрым адамдарда жөн эле адат болуп калган. Анткени туздуураак тамак даамдуу сезилет. Тилекке каршы, организмдеги ашыкча туз денеде суунун кармалышын шарттап, адамдын кан басымы жогорулайт. Ошондуктан мамлекеттик жөнгө салуунун механизмдеринин бири — адамдардагы тамактануу жүрүм-турумун өзгөртүү болуп саналат. Коомдук тамактануу жайларында туз салгычтарды алып салуу аркылуу тузду керектөөнү азайтуу максаты коюлууда", — деди Алимбекова.
Ал тузду азайтуу үчүн анын ордуна башка татымалдарды колдонуп, жаңы бышкан жашылчаларды көбүрөөк жеш керектигин кошумчалады.
