Өлкөдө тегирмендердин саны 31ге жетти. Ишкерлерди колдоо аракети
10:35 18.01.2024 (Жаңыртылды: 10:41 18.01.2024)
© Sputnik / Шабдан Абылгазы уулу
Жазылуу
Суу ресурстары, айыл чарба жана кайра иштетүү өнөр жай министрлигинин азык-түлүк коопсуздугу бөлүмүнүн башчысы Данияр Жанузаков өлкөдөгү ишкерлерди колдоо аракеттери тууралуу айтып берди.
Ишкерлерди колдоо, азык-түлүк коопсуздугун камсыздоо максатында бир катар айыл чарба багытындагы товарлар КНСтен бошотулду. Бул тууралуу Данияр Жанузаков Sputnik Кыргызстан радиосунда маек куруп жатып билдирди.
Өлкөдө тегирмендин саны 31ге жетти. Ишкерлерди колдоо аракети
Анын айтымында, тийиштүү токтомдор мурда эле кабыл алынып, учурда алардын иштөө мөөнөтү жыл соңуна чейин узартылган.
"Бир катар айыл чарба товарларын импорттоодо кошумча нарк салыгын (КНС) алып салуу боюнча токтом 2022-жылдын 11-мартында кабыл алынып, анын иштөө мөөнөтү алгач 2023-жылы, андан соң 2024-жылдын соңуна чейин дагы узартылды. Тизмеге инкубацияланган жумуртка, арпа, балык, мал тоюттары, тирүү мал жана башка маанилүү товарлар киргизилген. Бул кадамды бааны турукташтыруучу, нарктын өсүп кетүүсүн алдын алуучу механизм катары кароого болот. Мындан тышкары, ун иштетүүчү ишканалар жана Мамлекеттик резерв фонду үчүн алып келинген буудай КНСтен бошотулган. Бул иш-аракеттер жергиликтүү өндүрүүчүлөрдү колдоо жана азык-түлүк коопсуздугун камсыздоо максатын көздөйт. Чечим кабыл алынганга чейин өлкөдө сегиз гана тегирмен иштеп келген. Учурда алардын саны 31ге жетти. Ошондой эле тийиштүү мамлекеттик органдар жана буудайды кайра иштетүүчү ишканалар менен келишим түзүлгөн. Ага ылайык, тегирмендер 700 тоннадан 3000 тоннага чейин чийки затты кампаларында сактап туруу милдетин алган. Буга утурлай эле өлкө ичинде ун, буудай жана нандын баасын көтөрбөй кармап турушат", — деди
Ошондой эле ал учурда өлкөдө азык-түлүк тартыштыгы жок экенин кошумчалады.
