Каткырып күлбөңүз, фотосессия кылбаңыз... Музейде жүрүүнүн эрежелери
© Sputnik / Владислав Ногай
Жазылуу
Имараттын ичинде тамеки тартууга, ал жакка суусундук, тамак-аш, балмуздак, сагыз жана башка ушул сыяктуу нерселерди алып кирүүгө болбойт.
БИШКЕК, 16-янв. — Sputnik. Маданият, маалымат, спорт жана жаштар саясаты министрлиги музейдеги жүрүм-турум эрежелерин эскертти.
Мекеме мындай маданий жайга кирүүдөгү эреже кийим илгичтен башталарын белгилеген. Анда тыш кийимдерди гана эмес, көлөмдүү баштыктарды, кол чатырды да калтыруу кажет экендиги айтылат. Ошондой эле имараттын ичинде тамеки тартууга, ал жакка суусундук, тамак-аш, балмуздак, сагыз жана башка ушул сыяктуу нерселерди алып кирүүгө болбойт.
"Музей менен таанышууда көргөзмөнүн белгилүү бир бөлмөсүн же бир бөлүгүн тандаңыз. Мындай жол менен сиз керектүү маалыматты таап, көптөгөн кызыктуу маалыматтарды ала аласыз. Экскурсоводдун айткандарын кунт коюп угууга аракет кылыңыз. Музейде өзүн тынч алып жүрүү жана башкаларга тоскоолдук кылбоо керек.
Үнүңүздү бийик чыгарып сүйлөбөңүз, катуу күлбөңүз. Сиз кызыкпаган нерсеге башка бирөө абдан маани берип карап жаткан болушу мүмкүн", — деп айтылат министрликтин билдирмесинде.
Мындан тышкары, төмөнкү эрежелер да так сакталууга тийиш экендиги кошумчаланган:
музейде сын айтуудан да этият болуу керек, көркөм чыгарманы шылдыңдоо этикага жатпайт;
эгерде сизде суроо жаралса жаныңыздагы адамды алаксытпай музейдин адисине кайрылыңыз;
экскурсоводдун сөзүн бөлбөй, суроолоруңузду ал сүйлөп бүткөндө бериңиз;
музейдеги экспонаттарды кол менен кармабаңыз;
уюлдук телефондун үнүн чыгарууга болбойт;
жарык бергич менен сүрөт тартууга, деги эле уруксатсыз фотосессия кылууга жол берилбейт;
уруксатсыз коммерциялык, жарнамалык жана башка иштерди жүргүзүүгө тыюу салынат;
курал-жарактын жана пиротехникалык каражаттардын бардык түрлөрүн, газ баллондорун, косметикалык спрейлерди алып жүрүүгө болбойт;
музейдин айланасын булгабаңыз, таштанды таштабаңыз;
музейде ролик, самокат жана ушул сыяктуу каражаттарды колдонууга болбойт.
