Популист-патриоттор кайдан чыгат? Психологдун жообу

"Туура эмес патриотизм — жинденген радикалдык көз караштар. Мында популизм, сөз көп, бирок терең изилдөө аз. Менин тажрыйбамда ушундай патриоттордон Кыргызстандын тарыхын, "Манас" эпосун, кыргыз тилин, маданиятын олуттуу изилдеп чыктыңарбы деп сурасаң 99 пайызы терс жооп берет. Ал эми туура патриотизм — өзүнүн мекенин сүйүү менен бирге эле башка элди да, алардын маданиятын да сыйлайт. Өз өлкөсүн сүйүү үчүн башка этносторду кемсинтип, басынтышпайт. Мындай адамдардын көбү сүйүүгө жана мээримге толгон үй-бүлөлөрдө өсөт. Билимдүү болуп, өз маданияты менен кошо эле башка элдердин маданиятын да изилдеп, билгенге кызыгышат. Негизи ар бир эле баланын 5-6 жашка чейинки курагы абдан маанилүү. Адам төрөлгөндө эле бир адамга байланат. Ал — эне. Эгер байлануу процесси туруктуу болсо бала өзүн коопсуз сезет. Башкача айтканда, бөбөк ыйлаганда апанын жанында болушу, курсагы ачса тамак бергени жана башка ага жасаган камкор мамилеси бала үчүн өтө зарыл. Алар жакшы көргөндү башында билишпейт. Бара-бара жакшы көрүлгөндүгүн сезгенде гана өзүн жана айланасындагы адамдарды жакшы көрүшү мүмкүн. Өзүн сүйгөн адам башкаларды да оңой жактырып кете алат. Бирок апасы дайыма жанында болбой баласын бирөөгө таштап кеткен болсо, анда бала жабыркайт. Ата-энеси мигрант болуп иштегени кетиши мүмкүн. Мындай учурда балада сүйүү объектиси жоголуп, ордун башка нерселер менен толтурууга аракет жасашы мүмкүн. Ашыкча фанатизм да дал ушул жерден пайда болот. Бир лидерди өзүнө туу тутуп алат же ата-энесине болгон сүйүүсүн мекенге алмаштырууга аракет жасайт", — деди психолог.