Жалал-Абаддагы Барпы облустук драма театры 30 жылдыгын белгилеп жатат
© Sputnik / Асел Акмат
Жазылуу
Жалал-Абад облустук Барпы драма театрынын көркөм жетекчиси, Кыргыз Республикасынын эл артисти Бакыт Жумалиев аталган театрдын түптөлүү тарыхына токтолду.
Жалал-Абад облустук театры 1992-жылы ачылып, 1993-жылы Барпы Алыкуловдун ысымы ыйгарылып, облустук макам алган. Бул тууралуу Бакыт Жумалиев Sputnik Кыргызстан радиосуна маек куруп жатып билдирди.
Жалал-Абаддагы Барпы облустук драма театры 30 жылдыгын белгилеп жатат
Анын айтымында, аймактык театрда кадр маселеси курч бойдон калууда.
"Азыркы Жалал-Абад облусунда 1921-жылы эле театралдык үгүт группа түзүлгөн экен. Алар кыска театралдык оюндарды коюп турушкан. Андан кийин 1935-жылы кыргыз жана өзбек, эки труппа түзүлгөн. Бирок Улуу Ата Мекендик согуш башталып калып, актерлордун көбү фронтко кетип труппалар өз ишмердүүлүгүн токтоткон. 1961-жылы азыркы биздин театр отурган имарат маданият үйү катары берилген экен. Анда элдик театрлар иштеп турушкан. Бирок алар да театр статусун ала албай жоюлуп кеткен. 1972-жылы Россиялык театр искусствосу институтунун бүтүрүүчүлөр тобу келип, бир-эки жылдай иштеп кетишкен. Анткени Ош облусундагы театрдын имараты бүтүп, ошол жакка которулушкан. Аталган окуу жайдын кийинки бүтүрүүчүлөрү Капар Медетбеков, Бакирдин Алиев келип жаңыдан театрды түптөй баштаганда аларды Нарын облустук театрын түзүүгө жиберип, Жалал-Абад кайрадан театры жок калган. Ошондон кийин 1992-жылы ошол кездеги Ленинграддан бүтүп келген кыргыз актерлору, Ысык-Көлдө, Бишкекте иштеп жаткан жаш актерлер чогулуп Жалал-Абадга келип, театр ачканбыз. Бир жылдан соң облустук макамы ыйгарылып, Барпы Алыкуловдун ысымы берилген. Ошондон бери иштеп келе жатабыз", — деди Жумалиев.
Ал аймактык театр 30 жылдык мааракесине карата акын жана драматург Алтынай Темированын "Генийдин үрү" чыгармасынын негизинде режиссёр Назгүл Мырзаканова менен Талантбек Апыевдин "Барпы апыз" спектаклин коюп жатышканын кошумчалады.
