Баштапкы медициналык жардам эмне үчүн маанилүү? Адистин түшүндүрмөсү
© Sputnik / Асель Сыдыкова
Жазылуу
Медициналык жардамды уюштуруу жана дары саясаты башкармалыгынын баштапкы медициналык-санитардык жардам бөлүмүнүн башчысы Гүласыл Сүтүева Кыргызстан эгемендүүлүктү алгандан бери эле үй-бүлөлүк медицина институтун жолго коюу аракети көрүлүп келерин айтты.
Жеткиликтүү жана сапаттуу баштапкы медициналык-санитардык жардам көрсөтүү саламаттыкты сактоо системасын калыптандырууда приоритеттүү багыт болууга тийиш. Бул тууралуу Гүласыл Сүтүева Sputnik Кыргызстан радиосунун эфиринде маек куруп жатып билдирди.
Баштапкы медициналык жардам эмне үчүн маанилүү? Адистин түшүндүрмөсү
Анын айтымында, Кыргызстан эгемендүүлүктү алгандан бери эле үй-бүлөлүк медицина институтун жолго коюу аракети көрүлүп келет.
"Дүйнөлүк тенденцияга кайрыла турган болсок, учурда ооруп калган адамды дарылагандан көрө ооруну алдын алуу алда канча жеӊил жана арзан болуп калды. Андыктан биз да бул тажрыйбаны өлкөдө жайылтуу аракетин көрүп, үй-бүлөлүк медициналык борборлорду өнүктүрүүнү колго алганбыз. Мунун мааниси бала төрөлгөндөн баштап чоӊойгонго же карыганга чейин бир эле борбордо медициналык жардамды алышы керек деген нерсе. Баштапкы медициналык-санитардык жардам медициналык жардам системасынын негизин түзөт. Ал оорулардын алдын алуу, диагностикалоо, дарылоо, медициналык реабилитациялоо, кош бойлуулуктун жүрүшүнө мониторинг жүргүзүү, сергек жашоо образын жайылтуу жана калкты санитардык-гигиеналык тарбиялоо боюнча иш-чараларды камтыйт. Бирок биз бул тармакты толугу менен колго алдык деп айта албайм. Тилекке каршы, көпчүлүк бейтаптар баштапкы медициналык жардамды үй-бүлөлүк медициналык борборлоруна барып албай, дароо эле республикалык ооруканалардын эшигин каккылап жатышат", — деди Сүтүева.
Ал учурда баштапкы медициналык-санитардык жардам системасын өнүктүрүү үчүн акча жана кадр жетишсиздиги боюнча маселе бар экенин кошумчалады.
