Балдар арасында рак оорусунун көбөйүшүнүн себеби эмнеде?
11:23 28.08.2023 (Жаңыртылды: 11:34 28.08.2023)
© Sputnik / Асель Сыдыкова
Жазылуу
Эне жана баланы коргоо улуттук борборунун онкология бөлүмүнүн жетекчиси Султан Стамбеков статистика 30-40 пайызга өскөнүн айтты.
Бүгүнкү күндө Кыргызстанда оорулуу балдарды каттоо жана диагностика жакшырып, ага байланыштуу ооруну аныктоо көрсөткүчү өстү. Бул тууралуу Султан Стамбеков Sputnik Кыргызстан радиосунун эфиринде маек куруп жатып билдирди.
Балдар арасында рак оорусунун көбөйүшүнүн себеби эмнеде?
Анын айтымында, илимий фактыга таянсак дүйнө жүзүндө балдар рагынын статистикасы (жылына 100 миӊ баланын ичинен 12-16сы ооруга чалдыгат) бирдей болушу керек.
"Акыркы жылдары онкологиялык оору менен жабыркаган балдардын статистикасы 30-40 пайызга өстү. Кыргызстанда 2021-жылы 120, 2020-жылы 140 жаңы учур, 2022-жылдын аягында балдар арасында онкологиялык жана онкогематологиялык оорулардын 180 жаңы учуру катталды. Себеби 2021-жылы Улуттук онкология жана гематология борборунда жайгашкан балдар онкология бөлүмү Эне жана баланы коргоо улуттук борборуна которулду. Кыргызстандын булуӊ-бурчунан келген кичинекей бейтаптардын биздин бөлүмгө кайрылып консультация алуусу бир топ жеӊилдеп калды. Ошондуктан рак оорусуна жаӊы кабылган балдардын саны эмес, расмий катталгандардын саны жогорулады десек туура болот. Илимий фактыга таянсак, дүйнө жүзүндө балдар рагынын статистикасы (жылына 100 миӊ баланын ичинен 12-16сы ооруга чалдыгат) бирдей болушу керек. Бизде буга чейин мунун жарымы гана каттоого алынчу. Азыр диагностикалык методдорду, аныктоо куралдарын өркүндөтүү, техникалык базаны жакшыртуу боюнча активдүү иш жүрүүдө. Дары-дармектерди ачык бөлүштүрүү үчүн онкологиялык бейтаптардын санариптик реестри толук кандуу иштей баштайт. Ошондой эле Кыргызстан балдардын рак оорусуна каршы күрөшүү боюнча глобалдык демилгеге кошулуу ниетинде. Балдардын рак оорусуна каршы глобалдык демилге 2030-жылга карата эң кеңири тараган рак оорусунан балдардын 60 пайызын аман алып калууну көздөйт. Ал үчүн платформа төмөн жана орто кирешелүү өлкөлөрдү тиешелүү дары-дармек менен үзгүлтүксүз камсыз кылат", — деди Стамбеков.
Ал балдар онкологиясына бөлүнгөн каражат баштапкы жардамга гана жетип жатканын кошумчалады.
