Салбарова: бала эмизген келинди 6 айга чейин жайына коюу керек
© Sputnik / Асель Сыдыкова
Жазылуу
№8 Үй-бүлөлүк дарыгерлер борборунун директорунун орун басары Шайгүл Салбарова төрөлгөндөн кийин бир саат ичинде баланы эмизүү менен аны инфекциялардан коргоп, түрдүү оорулардан сактап калууга болорун айтты.
Кыргызстандагы алты айга чейинки ымыркайлардын 36-40 пайызы гана эмчек эмет. Бул тууралуу Шайгүл Салбарова Sputnik Кыргызстан радиосунун эфиринде маек куруп жатып билдирди.
Салбарова: бала эмизген келинди 6 айга чейин жайына коюу керек
Анын айтымында, акыркы 10 жылдан бери айыл аймактарда эмизүүнү коргоого, жайылтууга жана колдоого багытталган программалар уюштурулуп келет.
"Эмчек сүтү баланын акыл-эс жактан жетилүүсүн жакшыртып, келечекте мектептеги көрсөткүчтөрүн жогорулатат. Эмизүү өз кезегинде колдоону, кам көрүүнү талап кылат. Төрөлгөндөн кийин мүмкүн болушунча тезирээк эмчек эмиздирүү наристелердин жана энелердин ортосундагы түздөн-түз жана үзгүлтүксүз байланышты камсыз кылат. Медициналык кийлигишүүнү талап кылган абалдан башка учурда төрөлгөн балдарга эмизүүдөн башка эч кандай тамак-аш жана суусундук бербөө керек. Эне менен жаңы төрөлгөн ымыркайдын бир бөлмөдө 24 саат бою бирге болуусун камсыз кылуу абзел. Учурда кош бойлуу аялдар жана алардын үй-бүлөсү менен эмизүүнүн маанилүүлүгү жөнүндө сүйлөшүү абдан керек. Айрым учурларда "балаӊды эле эмизип отура бересиӊби" деп нааразычылыгын айткан кайнелелер болуп калат экен. Жаӊы төрөп, бала эмизген келинди 6 айга чейин үй-бүлө мүчөлөрү жайына коюшса деп айтат элем. Себеби бала эмизүү да абдан көп убакытты алат. Демек, шарт түзүп берүү абдан зарыл. Ымыркайды азыктандырууда бөтөлкөлөрдү, атайын упчуларды пайдалануунун да коркунучу бар. Эмгиси келип жаткан баланын белгилерин жана кыймылдардын таанып билүүсү үчүн энелерге колдоо көрсөтүү маанилүү. Бул жаатта эне бала көтөргөндөн баштап эле үй-бүлөлүк дарыгерлер борборунан маалымат алып, баланы эмизүүгө даярдана башташы керек. Ал эми жардам берүү дарыгерлердин милдети", — деди Салбарова.
Ал коомдун саламаттыгы үчүн ар бир мекемеде, жумушта бала эмизүүгө шарт түзүп берүү керектигин кошумчалады.
