Сколиоз оорусу эркек балдарга караганда кыздарда көп кездешет

"Сколиоз — бул омуртка тутумунун кыйшайышы менен мүнөздөлгөн оору. Омуртка тутумунун мындай түзүлүшү бала отуруп-туруп баса баштаганда калыптанат. Омуртка тутуму бир капталын карай (сколиоз), алдыга (лордоз), артка (кифоз) кыйшайышы мүмкүн. Омуртка тутумунун бир капталына кыйшаюусу – сколиоз өтө кеӊири тараган оору. Сколиоз сөөк өсүп жаткан мезгилде өтө байкалып, көбүнчө окуучуларда кездешет. Ага итий, начар тамактануу, дененин начар өрчүшү түрткү берет. Түйүлдүк туура эмес өрчүгөндө тубаса сколиоз пайда болот. Сколиозду кандайдыр бир оору (итий, полиомиелит, туберкулёз, плеврит, радикулит), травма (омуртка сынганда), тулку бойду туура эмес алып жүрүү, бир бут экинчисинен кыска болушу (физиологиялык сколиоз), баланын партада туура эмес отурушу, сумканы дайыма бир ийинде көтөрүп жүрүүсү шарттайт. Сколиоздун башталышында отурганда бел булчуңдары тез талыйт. Ал бир аз эс алганда эле тарайт (бул биринчи стадиясы). Экинчи стадиясында омуртка такай кыйшайып, көкүрөк клеткасынын формасы бузулат. Омуртканын кыймылы азаят. Булчуңдар жана кабырга арасы ооруйт (невралгия). Сколиоз өтө күчөгөндө ички органдардын жайгашуусу бузулуп, функциясы начарлайт. Бул кишинин эмгекке жөндөмдүүлүгүн жоготот. Сколиозду дарылоого караганда алдын алуу жеңил. Биринчи белгилери байкалганда эле дарыгерге кайрылып, ал сунуштаган көнүгүүлөрдү так аткаруу керек. Тубаса сколиозду эрте байкоо, дарылоодо врачтын көрсөтмөлөрүн кылдат аткаруу жакшы натыйжа берет. Кесипке жараша болгон сколиозду алдын алууда эмгек менен эс алууну туура уюштуруу, жумуш убагында тыныгуу, спортко катышуу, жалпы организмди жана булчуңду чыңдоо негизги роль ойнойт. Сколиоз пайда болгонун байкоо үчүн адам күзгүгө каранып, көкүрөк, ээгинин жайгашуусун көзөмөлдөп турушу керек", — деди Жалилов.