Тигүү цехине сырьё, эт, жүн ташуу. Кыргызстан менен Монголиянын кызматташуу ниети
10:08 10.07.2023 (Жаңыртылды: 10:09 10.07.2023)
Жазылуу
Эки өлкөнүн башчылары айыл чарба, тоо-кен, экономика, туризм жана маданий жактан кызматташуу ниетин ырасташкан.
БИШКЕК, 10-июл. — Sputnik. Президент Садыр Жапаровдун Монголияга болгон алгачкы мамлекеттик сапарынын алкагында өлкө лидерлери Кыргызстан менен Монголиянын достук жана кызматташтык орнотуу жөнүндө биргелешкен декларациясына кол коюшту. Бул тууралуу мамлекет башчынын маалымат кызматы кабарлады.
Анда тараптар төмөнкүдөй иштерди жүзөгө ашырууга даярдыгын билдиришкен:
Монголиядан Кыргызстанга эт, эт азыктарын, сүт азыктарын, жүн жана булгаары жеткирүү, ал эми Монголияга сапаттуу, экологиялык жактан таза айыл чарба продукциясын экспорттоо;
Тоо-кен тармагындагы кызматташтыкты өнүктүрүү, кен корун иштетүү боюнча долбоорлорду ишке ашырууда тажрыйба алмашуу;
Текстиль жана тигүү тармактарында өз ара пайдалуу кызматташуу жана эки өлкөнүн тийиштүү ишканаларынын ортосундагы түз байланыштарды кубаттоо. Монгол тарап Кыргызстандын тигүү өнөр жайы үчүн сырьё жеткирүүсү;
Деңизге чыгууга мүмкүнчүлүгү жок өлкөлөр катары транспорттук жана транзиттик коммуникацияларды өнүктүрүү үчүн зарыл болгон чараларды көрүү;
Монгол тарап кыргыз тараптын 2016-жылы түзүлгөн "Азия автомобилдик жол тармагы боюнча эл аралык автомобилдик ташуулар жөнүндө өкмөттөр аралык макулдашууга" кошулууга умтулуусун кубаттайт;
Эки мамлекеттин ортосундагы аба каттамдарын жандандыруу жана андан ары кеңейтүү;
Илимий-техникалык кызматташтыкты ырааттуу түрдө бекемдеп, биргелешкен илимий изилдөөлөрдү, тажрыйба алмашууларды жүргүзүү;
Маданий жана тарыхый жалпылыкты эске алуу менен кыргыз жана монгол элдеринин тарыхы менен маданияты, руханий жана материалдык мурастары боюнча биргелешкен изилдөөлөрдү жүргүзүү;
Максаттары окшош болгон "Жашыл мурас" жана "Миллиард бак-дарак" сыяктуу улуттук долбоорлорду ишке ашырууда өз ара көмөк көрсөтүү;
Эки мамлекеттин жогорку окуу жайларында кыргыз жана монгол тилдерин окутууну уюштуруу;
Маданият күндөрүн, фестивалдарды, көргөзмөлөрдү, чыгармачыл жамааттардын гастролдорун үзгүлтүксүз өткөрүү;
Туризм тармагында кызматташууну активдештирүү макулдашылды. Өз ара туристтик иш-чараларга катышуу, туристтик агымдарды көбөйтүү, ЖМК өкүлдөрүнүн өз ара маалымат турларын колдоо.
Соңунда Жапаров Монголиянын президенти Ухнаагийн Хурэлсухту өзүнө ыңгайлуу убакта Бишкекке иш сапар менен келип кетүүгө чакырган.
