Кыргызстандагы медициналык ЖОЖдордо интернатура калыбына келтирилет
© Sputnik / Асель Сыдыкова
Жазылуу
Саламаттык сактоо министрлигинин медициналык билим берүү жана илим бөлүмүнүн башчысы Нурида Жусупбекова медициналык ЖОЖдордо интернатураны киргизүү кадрларды даярдоонун сапатын жогорулатууга жардам берерин айтты.
Саламаттык сактоо министрлиги медициналык ЖОЖдордо интернатураны калыбына келтирүүнү сунуштады. Учурда министрлер кабинетинин тиешелүү токтомунун долбоору коомдук талкууга коюлду. Бул тууралуу Нурида Жусупбекова Sputnik Кыргызстан радиосунун эфиринде маек куруп жатып билдирди.
Кыргызстандагы медициналык ЖОЖдордо интернатура калыбына келтирилет
Анын айтымында, интернатуранын киргизилишине байланыштуу жалпы медициналык практика боюнча биринчи курстун программасын кыскартуу жолу менен тар адистиктер боюнча ординатурада окуунун мөөнөтүн кыскартуу сунушталды.
"Долбоордун максаты дипломдон кийинки медициналык билим берүүнүн деңгээлинде кадрларды даярдоонун сапатын жогорулатуу жана баштапкы медициналык-санитардык жардам үчүн медициналык кадрларды даярдоону күчөтүү болуп саналат. Ординатура жөнүндөгү жобого ылайык, тар адистиктер боюнча ординатураны аяктагандан кийин адистер жалпы практика программасынын биринчи жылын өтүшкөндүгүнө карабастан, тар адистиги боюнча гана жумушка орношо алышат, жалпы практикалык дарыгер болуп иштей алышпайт. Бул үчүн алар тар адистик боюнча ординатурадан кийин үй-бүлөлүк медицина, жалпы практикалык-дарыгерлик боюнча кайра даярдоодон өтүшү керек. Долбоор дарылоо иши боюнча жалпы медициналык практика, тез медициналык жардам, патологиялык анатомия, клиникалык лабораториялык диагностика жана жалпы аскердик-медициналык практика адистиктери жаатында бир жылдык интернатураны киргизүү каралууда. Демек, болочок дарыгерлер интернатураны жана ординатураны өткөндүгү тууралуу эки сертификат алат. Медициналык факультеттердин бүтүрүүчүлөрү үчүн интернатураны киргизүү кадрларды даярдоонун сапатын жогорулатат. Аларды өз алдынча медициналык практикага даярдап, децентралдаштырылган интернатуралардын санын көбөйтүү аркылуу аймактарды баштапкы медициналык-санитардык жардам деңгээлинде жалпы практикалык дарыгерлер менен камсыз кылат. Ошондой эле тар адистиктер боюнча дарыгерлерди даярдаган клиникалык базалардагы жүктөм азаймакчы", — деди Жусупбекова.
Ал, мындан тышкары, айрым адистиктер боюнча окутуунун мөөнөтүн өзгөчөлүгүнө жараша кыскартуу жана көбөйтүү да кайра каралышы мүмкүн экенин кошумчалады.
