Күндөн калкалоочу көз айнекти эмне үчүн жыл бою тагынуу керек?
© Sputnik / Асель Сыдыкова
Жазылуу
Офтальмолог Жазгүл Бегалиева көздү күндөн, шамалдан, чаӊдан коргобогондон улам кыргызстандыктарда птеригиум оорусу көп кездешерин айтты.
Күн жыл бою, атүгүл булуттуу күндөрдө да чыгат. Демек, ультрафиолет нурлануусу да көзгө дайыма таасирин тийгизет. Ошондуктан жылдын кайсы убагы болбосун, ультрафиолет нурунан коргоочу көз айнек тагынып жүрүү керек. Бул тууралуу Жазгүл Бегалиева Sputnik Кыргызстан радиосунун эфиринде маек куруп жатып билдирди.
Күндөн калкалоочу көз айнекти эмне үчүн жыл бою тагынуу керек?
Анын айтымында, сапатсыз кара көз айнек көрүү органдарына зыян келтирет.
"Линзадагы УФ-фильтри зыяндуу нурлардын карекке түшүүсүн алдын алат. Бул көздү ультра кызгылт көк нурлануунун интенсивдүү, узак мөөнөттүү таасиринен улам пайда болгон офтальмологиялык оорулардын алдын алууга жардам берет. Көз айнек көздү күндөн гана эмес, шамалдан, чаӊдан да коргойт. Эгерде көз алмасынын былжыр челине чаӊ түшсө, ал сезгенүүнү жана конъюнктивитти пайда кылат. Ал эми суукта жаш көп агып, шамалдан улам көз жашы тез бууланып, көз кургап кетет. Андан тышкары, көздү күндөн, шамалдан, чаӊдан коргобогондон улам кыргызстандыктарда птеригиум оорусу көп кездешет. Ал эми линзада ультрафиолет нурлануусунан коргоочу фильтр жок болсо, ал көрүү органдарына зыян. Кара көз айнек каректин кеңейишине себепкер болот да ушундан улам зыяндуу нурлар карекке көбүрөөк кирет. Бул фотокератит, катаракта, таптакыр көрбөй калууга алып келет. Ошондой эле арзан линзалар менен көз айнек тагынган адамдарда астигматизм, көздүн чарчоосу да байкалат. Андыктан биринчи кезекте көз айнек тандоодо анда күндөн коргоочу чыпкалардын болушуна көӊүл бөлүү зарыл. Көз айнектерди атайын дүкөндөрдөн, оптикалардан сатып алууну сунуштайм. Көз нейтралдуу түстөрдү, боз, боз-күрөң, боз-жашыл түстүү линзалары бар көз айнектерди тагынганда комфорттуу сезет. Андыктан ар кандай кызыл-тазыл көз айнектерди албай эле койгон оӊ", — деди Бегалиева.
Ал көз айнек көздү гана эмес, анын тегерегиндеги терини да ультрафиолет нурларынан сактап, көздүн айланасындагы бырыштарды алдын аларын кошумчалады.
