Нутрициолог тамакты чектебей, бирок толбой жүрүүнүн жолдорун айтып берди

"Өлкөдө учурда аялдар арасында ашыкча салмактан жабыркоо тенденциясы күч алууда. Буга биринчи кезекте биз туура эмес тамактангандыгыбыз себеп болууда. Туура тамактануу — диета эмес. Анда эч кандай чек жок. Ошол эле палоо, манты сыяктуу тамактарды жеп, таттуудан өзүн чектебей, бирок салмагын бир калыпта алып жүрсө болот. Ал үчүн болгону эмнени канча жеш керек, кайсы учурда билип алган жетиштүү. Мисалы, камырлуу тамакты сүйгөндөр жогорку сорттогу ак ундардан көрө кара ундан жасашы керек. Рациондон майонез жана башка татымалдарды алып, ордуна колго жасалган соустарды, лимон ширесин, зайтун (оливка) жана башка өсүмдүк майларын салаттарга колдонсо болот. Таттуу сүйгөндөр торт, печеньелерди эмес мөмө-жемишти өтө көп эмес өлчөмдө жеп турса жана клетчаткаларга бай азыктарды кабыл алса таттууга болгон кызыгуусу акырындап тарайт. Сууну да кечки 17:00гө чейин көбүрөк ичип, түштөн кийин азайткан туура. Ал эми жашылча-жемишти чектебей эле каалашынча жей берсе болот. Эртең менен турганда эле эки стакан жөнөкөй, жылуу суу ичиш керек. Андан соң жарым сааттан кийин таңкы тамакка ботко же жумуртка жесе болот. Түштө эт, жашылча-жемиштен турган тамак-аш жеп, кечинде суюк тамак ичип алган оң. Мунун ортосунда бир стакан газдалбаган нукура суусундук ичип же мөмө-жемиш жеп койсо болот. Сөзсүз эле кечки 18:00дөн кийин тамактанбайм деген принципти карманбай, жатарга чейин үч саат мурда тамактанып алса жетиштүү", — деди Салиева.