Кыргызстандын дары-дармек өндүрүүгө дарамети жетеби?
© Sputnik / Асель Сыдыкова
Жазылуу
Соода-өнөр жай палатасына караштуу Кыргыз Республикасынын фармацевтикалык жана медициналык ишмердүүлүктү өнүктүрүү боюнча комитетинин төрайымы Айзада Кыдыралиева өлкөнүн фармацевтика тармагынын көйгөйлөрү жана мүмкүнчүлүктөрү жөнүндө айтып берди.
Акыркы жылдары Кыргызстанга жылына дээрлик 20 миллиард сомго дары-дармек импорттолгон. Өлкө ушинтип чет элдик өндүрүүчүлөргө көз каранды болбостон өзүнүн фармацевтика тармагын жолго коюшу зарыл. Бул тууралуу Айзада Кыдыралиева Sputnik Кыргызстан радиосунун эфиринде маек куруп жатып билдирди.
Кыргызстандын дары-дармек өндүрүүгө дарамети жетеби?
Анын айтымында, Кыргызстан ЕАЭБге мүчө өлкө катары фармацевтика тармагын өнүктүрө алат.
"Тилекке каршы, иш жүзүндө өндүрүүчүлөр менен дистрибьюторлор жалгыз чече албаган көптөгөн тоскоолдуктар бар. Жакында эле Соода-өнөр жай палатасынын алдында ата мекендик дары-дармек өндүрүүчүлөрүнүн башын бириктирген адистештирилген комитет түзүлдү. Бул республика үчүн өтө зарыл болгон тармакты өнүктүрүүгө жардам берет деп ишенебиз. Өлкөдө дары-дармектерди жана медициналык буюмдарды чыгаруу үчүн Саламаттык сактоо министрлиги 42 ишканага лицензия берген. Бирок учурда 10дон ашууну гана дары-дармектерди өндүрүп, өлкөнүн керектөөсүнүн үч пайызын гана жабат. Калган 97 пайызын импорттоого аргасызбыз. Демек, мамлекеттин жардамы менен өндүрүш жанданса, анда талаптын жок дегенде жарымын ата мекендик ишканалар камсыздай тургандай кылса болот. Ал үчүн каржы маселесин гана эмес, мыйзамдык маселелерди да чечүү зарыл. Мисалы, мамлекетке жергиликтүү өндүрүүчүлөрдүн продукциясын сатып алууга кепилдик берилсе, бул фармацевтика тармагын өнүктүрүүгө чоң түрткү берет. Мындан тышкары, ата мекендик компанияларды ар тараптан коргоо жана аларга артыкчылыктарды берүү зарыл. Алардын продукциясы чет өлкөлүк өндүрүүчүлөрдүкүнө караганда алда канча арзан түшөт", — деди Кыдыралиева.
Ал Кыргызстан ЕАЭБдин сертификациясынан 2026-жылга чейин өтпөсө, анда жергиликтүү дары-дармек чыгаруучу ишканаларысыз калышы мүмкүн экенин кошумчалады.
