Былтыр Кыргызстанда баӊгизат өндүргөн 10 лаборатория аныкталган
© Sputnik / Асель Сыдыкова
Жазылуу
ИИМдин Баңгизатты мыйзамсыз жүгүртүүгө каршы күрөшүү кызматынын бөлүм башчысы Айдар Шигаев өлкөдө баӊгизаттардын жайылуу себеби жана аны менен күрөшүү аракеттери тууралуу айтып берди.
2016-2021-жылдары мыйзамсыз жүгүртүлгөн синтетикалык баӊгизат, психотроптук каражаттардын жалпы көлөмү 10 килограммдан ашпаса, 2022-жылы 230 килограммдан көп зат алынган. Демек, бул баӊги топтору жаӊы рынок издеп Борбор Азияга кирип келди дегенди түшүндүрөт. Бул тууралуу Айдар Шигаев Sputnik Кыргызстан радиосунун эфиринде маек куруп жатып билдирди.
Былтыр Кыргызстанда баӊгизат өндүргөн 10 лаборатория аныкталган
Анын айтымында, өткөн жылы Баңгизатты мыйзамсыз жүгүртүүгө каршы күрөшүү кызматы мефедрон, альфа PVP баӊгизаттарын өндүргөн 10 лабораторияны аныктап жапкан.
"Кыргызстанда эле эмес, Россия, Казакстан, Европа мамлекеттеринде да синтетикалык баӊгизаттардын мыйзамсыз жүгүртүлүшү, бул процесске жаштардын катышуусу чоӊ маселе болууда. Биздеги өзгөчөлүк — төрт фактордон турган баӊгизат кырдаалынын түптөлүшү. Биринчиден, биз Афганистанга жакын болгондуктан ал жактан баӊгизат транзиттик жол менен алып келинүүдө. Ошондой эле өлкөдө баӊгизат өндүрө турган сырьелук база бар. Эфедра, кара куурай колдонулуп жатат. Андан тышкары, синтетикалык жана жаӊы психоактивдүү заттардын пайда болушу бизде эле эмес, Борбор Азияда дагы баӊгилик кырдаалдын өнүгүшүнө шарт түзүүдө. Азыркы учурда канчалык алдын алуу иштерин жүргүзбөйлү, жаш балдар жеӊил акча табууга кызыгып, баӊгизат ташып иштеп кетип жатышат. Болбосо мектептерде жашы жете электердин иштери боюнча инспекторлор иштейт, аймактык тескөөчүлөр, ИИМдин Баңгизатты мыйзамсыз жүгүртүүгө каршы күрөшүү кызматы мектеп жана башка ушул сыяктуу мекемелерде түшүндүрүү иштерин жүргүзүп келет. Ал эми Саламаттык сактоо министрлигинин Республикалык психиатрия жана наркология борборунун маалыматына ылайык, баӊгизат колдонуучуларынын саны азаюуда. Бирок биз бул статистикага алданбашыбыз керек. Себеби бардык эле баӊгизат колдонуучулар аталган борбордун каттоосуна алынган эмес", — деди Шигаев.
Ал синтетикалык баӊгизаттар арзан, жеткирүүгө оӊой болгондуктан кеӊири жайылып жатканын, бул заттар адамда дароо көз карандылыкты пайда кылганы менен кооптуу экенин кошумчалады.
