Актан Арым Кубат менен Хасан Кыдыралиевдин тандеми. Таберик сүрөт
20:11 29.03.2023 (Жаңыртылды: 09:53 31.03.2023)
Жазылуу
Sputnik Кыргызстан маалымат агенттиги архивде сакталып жаткан сейрек сүрөттөрдү жарыялап, тарыхын баяндайт.
© Фото / Эркин Болжуров
Кыргыз Республикасынын эл артисттери, белгилүү кинооператор Хасан Кыдыралиев менен таланттуу кинорежиссёр Актан Арым Кубаттын сүрөтү 2015-жылы тартылган.
Ал жылы "Кентавр" тасмасы камерага түшүрүп, Арым Кубат тасмага режиссёрлук, Кыдыралиев операторлук кылган. Фильмге Актан Арым Кубат өзү, Таалайкан Абазова, Болот Тентимишов, Зарема Асаналиева, Илим Калмуратов, Нурали Турсункожоев, Максат Мамырканов тартылган.
Токтогул атындагы мамлекеттик сыйлыгынын лауреаты Хасан Кыдыралиев кесиптеши жөнүндө буларды айтып берди.
"Актан байке менен алгачкы жолу 1989-жылы "Жолбун ит" даректүү тасмасын тартып, ошондон бери кинематографияда иштешип келебиз. Андан бери "Үйүң кайда, үлүл?", "Селкинчек", " Беш кемпир", "Маймыл", "Свет аке", "Кентавр" тасмасында оператор болуп, соңку "Эсимде" кинофильмин гана Казакстанда болуп калып тарта албай калдым. Негизи Актан байкенин эмгектеринин баарын эле мен тарттым. Экөөбүз бири-бирибизди көз карашыбыздан эле түшүнөбүз, камерага түшүрчү объектини, аны кантип тартуу керектигин дайым талкуулайбыз. Кинокартиналарында ал айыл турмушуна көп кайрылып, тасма тартууда башкалардан өзгөчөлөнгөн ыкмаларды колдонуп келет", — деди Кыдыралиев.
Киночулардын 1998-жылы биргеликте тарткан "Беш кемпир" кинофильминин аркасы менен экөө 2000-жылы Токтогул атындагы мамлекеттик сыйлыктын лауреаттары болушкан.
Ал эми Актан Арым Кубат Кыргызстанда Хасан Кыдыралиевдей күчтүү оператор жок экенин белгилейт.
"Раматылык белгилүү кинооператор Мурат Алиев "оператор толук ачылыш үчүн режиссёр экөөнүн ортосунда тандем болушу керек. Кыргыздын киносунда эки эле тандем бар. Биринчиси, Хасандын атасы Кадыржан Кыдыралиев менен Төлөмүш Океев болсо, экинчиси, сени менен Хасан" деп калчу. Кинодо мыкты эмгек жаратуу үчүн жакшы тандем болушу керек. Хасан менин соңку "Эсимде" фильмимен башкасынын баарын тартты. Экөөбүз узак убакыттан бери иштешип келебиз. Ал Кыргызстандагы эң күчтүү оператор, бизде андай башка оператор жок. Анын дараметин, күчүн Россия, Азербайжан, Өзбекстан, Казакстандагы кесиптештер да жакшы билет. Казакстанда "Рэкетир", "Көчмөн" ("Кочевник"), "Томирис" өңдүү чоң тасмалардын көпчүлүгүн камерага түшүрүп, ал жакта көп иштеп келет. Биз болсо аны түрдүү себептерден улам ири долбоорлорго чакыра албай жүрөбүз", — деди режиссёр.
Эске сала кетсек, эки киночунун 2015-жылы тарткан "Кентавр" тасмасы эки жылдан кийин эл сынына коюлуп, дүйнөлүк премьерасы Берлиндеги эл аралык кинофестивалда өткөн.
Тема боюнча:
