КММАнын педиатрия факультетинде бюджеттик орундар көбөйтүлөт
© Sputnik / Асель Сыдыкова
Жазылуу
Министрликтин медициналык жардам жана дары-дармек саясатын уюштуруу башкармалыгынын жетекчиси Нургүл Ибраева балдар дарыгерлеринин азайып кетишинин себеби жана бул маселени жоюу аракеттерине токтолду.
Бүгүнкү күндө КММАда жалпысынан 554 студент педиатрия боюнча билим алып жатат. Быйыл педиатрия адистиги боюнча жалпы 173 студент (КММА – 80, КРСУ – 75 жана ОшМУ – 18 студент) окуусун бүтүрөт. Бул тууралуу Нургүл Ибраева Sputnik Кыргызстан радиосунун эфиринде маек куруп жатып билдирди.
КММАнын педиатрия факультетинде бюджеттик орундар көбөйтүлөт
Анын айтымында, бүгүнкү күндө республика боюнча 800гө жакын гана педиатр бар.
"1996-2006-жылдары Саламаттык сактоо тармагын реформалоонун "Манас" улуттук программасына ылайык баштапкы медициналык жардам берүүгө басым жасалып, үй-бүлөлүк медицина институту ишке киргизилгенден кийин республика боюнча үй-бүлөлүк дарыгерлер топтору түзүлгөн. Ооруканалардагы керебеттер кыскарып, чоңдор, балдар поликлиникалары жана төрөт үйлөрү бириктирилди. Ошентип 2,7 миңге жакын терапевт, педиатр жана акушер-гинеколог үй-бүлөлүк медицина боюнча кыска мөөнөттүү курстарда кайра даярдоодон өтүштү. Учурда балдар дарыгерлери негизинен чоң шаарлардагы балдар ооруканаларында иштейт. Биздин система боюнча, бир жогорку квалификациялуу педиатрды даярдоо үчүн медициналык окуу жайда 6 жыл жана клиникалык ординатурада 2-3 жыл сарпталат. Педиатрларды даярдоо — өтө түйшүктүү, узак, бирок зарыл иш. Педиатрия факультети приоритеттүү адистик болбой калгандан уламбы, айтор, бүтүрүүчүлөр бул факультетке тапшырбай калып, андан улам окутуучулардын саны да азайып кеткен. Бүгүнкү күндө КММАда жалпысынан 554 студент педиатрия боюнча билим алат. Бул, албетте, абдан аз. Быйыл педиатрия адистиги боюнча жалпы 173 студент (КММА – 80, КРСУ – 75 жана ОшМУ – 18 студент) окуусун бүтүрөт. Үстүбүздөгү жылдын январь айында Кыргызстанда педиатриялык кызматты калыбына келтирүү маселесин министрлер кабинети менен биргеликте карадык. Анда КММАдагы окутуучулардын жана педиатрия факультетинде бюджеттик орундардын санын көбөйтүү чечимине келдик. Азыр 285 бюджеттик орун бар. Аны көбөйтүү аракеттери көрүлө баштады", — деди Ибраева.
Ал келечекте бюджетке өткөн студенттер менен келишим түзүлүп, эгерде мамлекеттик ооруканаларда иштебесе, анда өкмөт окууга короткон каражатын кайтартып алуу чарасы көрүлөрүн кошумчалады.
