Режиссёрлордун аздыгынан жаштарга арналган спектаклдер чанда. Театр көйгөйү
© Sputnik / Асель Сыдыкова
Жазылуу
Бакен Кыдыкеева атындагы Жаш көрүүчүлөр театрынын актёру Өмүрзак Токтомуратов аталган театрдын тарыхы, спектаклде көтөрүлгөн темалар тууралуу айтып берди.
Бакен Кыдыкеева атындагы Жаш көрүүчүлөр театры 1929-жылы Кыргыз ССРинин борбору Фрунзе шаарында негизделген. 1943-жылы жабылган театр 1989-жылы кайра ишин уланткан. Бул тууралуу Өмүрзак Токтомуратов Sputnik Кыргызстан радиосунун эфиринде маек куруп жатып билдирди.
Режиссёрлордун аздыгынан жаштарга арналган спектаклдер чанда. Театр көйгөйү
Анын айтымында, 2013-жылы алты жылдык чыгармачылык тыныгуудан кийин театр кайрадан жандана баштаган.
"Кыргыз жаштар театры 1929-жылы түзүлүп, башкы режиссёру Отунчу Сарбагышев болгон. Театрдын репертуарынын басымдуу бөлүгү "класстык пьесалардан" турган. Бирок Кыргызстандагы башка драма жана музыкалык драма театрларынан айырмаланып, жаш көрүүчүлөргө багытталган Жаштар театры элдик дастандардын, чакан эпостордун негизинде спектаклдерди да сахналаштырган. 1936-жылы театрга жаш актриса Бакен Кыдыкеева келген. 14 жашында Лопе де Веганын "Кой булагы" пьесасынын негизинде коюлган спектаклде Лоренсиянын ролун аткарган. 1943-жылы Отунчу Сарбагышев каза болгондон кийин театр жабылган, анткени согуш убагында жетекчиликти колго ала турган адам болгон эмес. 1989-жылы 16-июнь күнү театр жабылгандан 46 жыл өтүп ушундай эле аталыштагы жаңы труппа уюштурулду. Анда СССРдин эл артисти Капар Медетбеков, Кыргыз ССРинин эл артисттери Бакирдин Алиев, Назира Мамбетова, киноактёр Болот Бейшеналиев, Чынар Калыбекова сыяктуу актёрлор ойношту. 90-жылдардын экинчи жарымында өнөрпоздордун жаңы мууну, экинчи актёрлордун тобу кошулду. Жаңы түзүлгөн Кыргыз жаштар театры адегенде эпикалык-жомок багытын карманып, репертуарда кыргыз эпосунун негизинде жаралган спектаклдер басымдуу эле. 2000-жылдары заманбап пьесалар коюла баштаган. Ал эми актриса Бакен Кыдыкеева 1992-жылдары театрга кайтып келген. 1993-жылы эртең жаӊы жыл дегенде эже каза болуп калып, коллектив жапырт колдоп театрга Кыдыкееванын ысымы ыйгарылган", — деди Токтомуратов.
Ал Бакен Кыдыкеева атындагы театр жаш көрүүчүлөрдүн театры болгону менен режиссёрлордун жетишсиздигинен жаштарга арналган спектаклдер аз коюларын кошумчалады.
Эскерте кетсек, бүгүн 27-март — Театрдын эл аралык күнү.
