Аксы окуясы кризисти эскерткен коңгуроо болгон. Садыр Жапаров элге кайрылды

© Пресс-служба президента КР / Султан ДосалиевКыргызстандын президенти Садыр Жапаров. Архив
Кыргызстандын президенти Садыр Жапаров. Архив - Sputnik Кыргызстан, 1920, 17.03.2023
Жазылуу
Мындан 21 жыл мурда Аксы районунда дал ушун күнү жергиликтүү эл нааразычылык акциясына чыгып, жыйынтыгы кейиштүү аяктап, алты адамдын өмүрү кыйылган.
БИШКЕК, 17-мар. — Sputnik. Президент Садыр Жапаров бүгүн, 17-мартта, Аксы окуяларын эскерүү күнүнө карата кыргызстандыктарга кайрылуу жасап, аны өлкөнү башкаруу кризиске кептелип баратканын эскерткен коңгуроо болгон деп сыпаттады.
Мамлекет башчынын маалымат кызматы кайрылуунун текстин таратты. Жапаров анда Аксы окуясы экономикада, саясатта, идеологияда жалпы элдин көз карашын өзгөрткөнүн белгилеп, бир нече учурларга токтолгон.
"Бул окуя өлкөнү башкаруу кризиске кептелип баратканын эскерткен коңгуроо болгон. Ал Кыргызстан тарыхынын саясий өнүгүүсүндө коомдук аң-сезимди өзгөртүү менен жалпы өлкөдөгү саясий трансформациянын өзгөрүшүнө, башкача кадам таштоосуна алып келди. Аксы окуясы экономикада, саясатта, идеологияда жалпы элдин көз карашын өзгөрттү. "Элдин күчү – сел" дегени чын белем, мамлекет үчүн кайдыгер карабаган, тайманбас жүрөктөрдү ойготту. Ошентип тарыхтын жүрүшүн өзгөртүп, өзгөчө окуя катары элдин эсинде калды. Аксы окуясы менен Кыргызстандын соңку жаңы тарыхы өзүнүн жаңы барагын ачты", — деген Жапаров.
Президент бул күн миң жылдап убакыт өтсө да эскерилип турарын, көптөр бул окуядан сабак аларын белгиледи.
"Аксы окуясы ошол учурдагы эки тараптын жүзүн ачкан: бийликтегилер өлкөнү башкаруудагы манипуляциялык иш-аракеттерди жасаса, оппозиция элдин, коомчулуктун күчүн өз кызыкчылыгына колдонуу тактикасына өткөн. Ошентип Аксы окуясынан кийинки Кыргызстандын 20 жылы саясий окуяларга бай болуп, элди, саясий элитаны бышырды. Баарыбыз тарыхтан сабак алдык", — деген ал.
Тарыхчылар дагы бул окуяга далай жолу ар түрдүү өңүттөн карап, өз бааларын беришери, бир гана нерсе – Аксы окуясы мамлекеттин тарыхында, өлкөнүн өнүгүүсүндө өчпөс из калтырганы өзгөрүүсүз калары айтылды.
"Мындай жаркын келечек мамлекеттүүлүк үчүн жанын курман кылган ар бир жараныбыздын үмүтү, тилеги эле. Биз аны аткарууга милдеттүүбүз. Элибиз – биздин эң күчтүү ресурсубуз. Биз элге гана таянабыз. Эзелтен бери эрки сынбаган эркин элибиз бар болсун!" — деп жыйынтыктаган Жапаров кайрылуусун.
Жалал-Абад облусунун Аксы районунда 2002-жылы 17-мартта жергиликтүү эл нааразычылык акциясына чыккан. Алар камакка алынган Жогорку Кеңештин депутаты Азимбек Бекназаровду бошотуу жана Үзөңгү-Куушту Кытайга бербөө талабын коюшкан. Демонстранттарды токтотуу үчүн Боспиекте тартип коргоо кызматкерлери күч колдонуп, ок чыгарып, анын кесепетинен алты адам каза болуп, бир нечеси ур-токмокко алынган. Бул боюнча тартип коргоо органдары тарабынан атайын "Тайфун" операциясы уюштурулган.
Аксы окуясына 20 жыл. Элдин аң-сезимин өзгөрткөн каргашадагы ирмемдер - Sputnik Кыргызстан, 1920, 17.03.2022
Аксы окуясына 20 жыл. Элдин аң-сезимин өзгөрткөн каргашадагы ирмемдер
Жаңылыктар түрмөгү
0