Дуйшегулов: жарандын насыя тарыхы 5-7 жыл сакталат
© Sputnik / Асылбек Бактыбеков
Жазылуу
"Ишеним" насыя бюросунун башкы директору Марлис Дуйшегулов насыя алган жарандын насыялык маалыматы электрондук түрдө атайын жабдууларда — серверлерде сакталарын айтты.
Мыйзамга ылайык, насыя маалыматынын сактоо мөөнөтү беш же жети жылды түзөт. Позитивдүү кредиттик маалымат насыя жабылган күнүнөн тарта жети жыл, ал эми терс кредиттик маалымат беш жылга чейин сакталат. Бул тууралуу Марлис Дуйшегулов Sputnik Кыргызстан радиосунун эфиринде маек куруп жатып билдирди.
Дуйшегулов: жарандын насыя тарыхы 5-7 жыл сакталат
Анын айтымында, насыя алган ар бир жаран насыя тарыхын көзөмөлдөп, байкап турушу керек.
"Насыя тарыхы — бул жеке же юридикалык жактын банктардан, микрофинансылык жана башка финансылык уюмдардан алынган кредити боюнча насыя бюросу тарабынан түзүлгөн маалыматтардын жыйындысы. Анда кардардын канча суммада, кандай шарт менен насыя алганынан баштап, кайсы убакытта төлөгөнүнө чейинки маалымат топтолот. Насыялык маалымат электрондук түрдө атайын жабдууларда — серверлерде сакталып, коопсуздугу көзөмөлдөнөт. Мыйзамга ылайык насыя маалыматынын сактоо мөөнөтү беш же жети жыл. Позитивдүү кредиттик маалымат насыя жабылган күнүнөн тарта жети жыл, ал эми терс кредиттик маалымат беш жылга чейин сакталат. Бүгүнкү күндө жарандардын насыя тарыхын Кыргызстанда эки гана компания түзөт. Алардын бири "Ишеним" насыя бюросу 2003-жылдан бери ишмердүүлүк жүргүзүп, жалпы 6,5 миллион насыя тарыхы түзүлдү", — деди Дуйшегулов.
Ошондой эле адис насыя алууда кимдир бирөөгө кепилдик берүүчү болууда ойлонуп, туура чечим чыгаруу керектигин кошумчалады.
