Россия Кыргызстанга куруп бере турган 9 мектеп тууралуу эмне белгилүү
Жазылуу
Буга чейин билим жайларынын кайсы жерлерге салынары боюнча айтышкан эле.
БИШКЕК, 23-янв. — Sputnik. Билим берүү жана илим министринин орун басары Надира Жусупбекова Россиянын Кыргызстанга куруп бере турган 9 мектеби тууралуу кененирээк айтып берди.
Буга чейин билим жайларынын кайсы жерлерге салынары боюнча айтышкан эле.
Жусупбекова төмөнкүлөрдү билдирди:
мектептерде эки өлкөнүн окутуу стандарттары колдонулат. Бүтүрүүчүлөр Кыргызстандын да, Россиянын да билим берүү боюнча күбөлүгүн алышат. Кааласа ЕГЭ – мамлекеттик бирдиктүү экзаменди тапшырат;
ар бир мектеп 1 224 окуучуга ылайыкталган;
балдарды россиялык да, кыргызстандык да мугалимдер окутат;
эгерде аянты кененирээк болсо, Россия тарап мектептин жанына мугалимдер үчүн жатакана куруп берет;
Россия билим жайын куруу менен чектелбестен, аны эмерек, зарыл болгон жабдуулар жана китептер менен камсыздайт;
РФ тарап россиялык стандарт менен окуткан мугалимдерге айлык төлөйт, имаратты оңдоп-түздөйт, жашылдандырат, кенже класстын окуучуларын ысык тамак менен камсыздайт.
Буга чейин ар бир мектепти салууга орто эсеп менен 450 миллион сомго чукул каражат кетери маалымдалган. Кыргыз бийлиги бул билим жайларын салууга жер бөлүп берет.
Мектептер үч жылда салынып бүтөрүн айтышты.
