Кабылова: тыштан кирген зыяндуу организмдер чыгымга кептейт
© Sputnik / Асель Акмат
Жазылуу
Өсүмдүктөрдү химиялаштыруу, коргоо жана карантин департаментинин өсүмдүктөрдүн тышкы карантини бөлүмүнүн башкы адиси Райла Кабылова тыштан зыяндуу организмдерди киргизбөө үчүн жасала турган иштер тууралуу айтып берди.
Тыштан кирген зыяндуу организмдер, өсүмдүктөрдүн илдеттери эбегейсиз каржылык чыгымга алып келиши ыктымал. Бул тууралуу Райла Кабылова Sputnik Кыргызстан радиосуна маек куруп жатып билдирди.
Кабылова: тыштан кирген зыяндуу организмдер чыгымга кептейт
Анын айтымында, учурда тыштан кирүүчү зыяндуу организмдердин саны 250-300гө чукулдаган.
"Өсүмдүктөр өлкөнүн флорасын тыштан кирүүчү зыяндуу организмдерден коргош үчүн карантинге алынат. Ал үчүн чек арада атайын посттор орнотулган. ЕАЭБге киргенге чейин тыштан кирүүчү зыяндуу организмдердин улуттук тизмеси бар болчу. Анда жүздүн тегерегинде вирус, бактерия жана козу карындын (грибы) аталышы камтылган. Кийин биримдикке мүчө-мамлекеттер менен бирдиктүү тизме түзүлүп, макулдашылды. Учурда анда 250-300гө чукул бактерия, вирустардын аталышы бар. Өлкөнүн экономикалык алакасы кеңейип жатканына байланыштуу бул тизме улам толукталып турат. Айрым учурда өлкөгө кирип, көзөмөлдөөгө мүмкүн болгон организмдер тизмеден чыгарылат. Ал эми зыяндуу организмдерди киргизбеш үчүн импорттолгон өсүмдүктөрдүн фитосанитардык сертификаты талап кылынат. Андан тышкары, ар бир продукциядан үлгү алынып, лабораториядан текшерүүдөн өткөрүлөт. Экспертизанын түрүнө жараша эки-үч сааттан 2-3 күнгө чейин созулат. Өзгөчө үрөн жана көчөт материалдар дыкат текшерилет", — деди Кабылова.
Ошондой эле ал учурда Жалал-Абаддан башка облустарда жана Бишкек, Ошто лабораториялар бар экенин кошумчалады.
