Акылбек Түмөнбаев: 7-кабатты "Ата-Журт Кыргызстан" менен "Мекенчил" ээлеп алды
19:01 07.12.2022 (Жаңыртылды: 21:11 07.12.2022)
© Фото / пресс-служба Жогорку Кенеша
Жазылуу
Түмөнбаев кесиптешинин дагы деле кабинети жок жүргөнүнө ызаланды.
БИШКЕК, 7-дек. — Sputnik. Жогорку Кеңештин депутаты, "Элдик" депутаттык тобунун лидери Акылбек Түмөнбаев эки фракция Ак үйдүн 7-кабаттагы кабинеттерин ээлеп алды деп сындады.
"Өмүрбек Бакировду кабинетинен мыйзамсыз чыгарып койгону боюнча унчукпайын дедим эле. Бүгүн "Ата-Журт Кыргызстан" менен "Мекенчил" өзү билемдик кылып жатат. Урматтуу төрага, сиз мындай мыйзамсыз иштерди дагы кыла берсеңиз, сиздин да кызматтык ордуңузду карайбыз. Анткени квадраттык залды, 709-кабинетти катчылыгыңарга берип, 7-кабатта ким отурса баарын ылдый түшүрөбүз деп жатасыздар. Сизди калыс төрага болот деп шайлаганбыз, адилет караңыз! Болбосо 7-кабаттагы кабинеттердин баарын сиздерге берели", — деди Түмөнбаев.
Ал эми "Ата-Журт Кыргызстан" фракциясынын лидери Бакыт Сыдыков кесиптешинин айткандарын төгүндөдү.
© Фото / пресс-служба Жогорку Кенеша
"Акылбек Тогузбаевичтин маанайы жакшы эмес окшойт. Чынында ызаланып жатса керек. "Ата-Журт Кыргызстан" фракциясы өзү билемдик кылып жатат" дегенине мен кошула албайм. Себеби 709-кабинетте Элмурза Ракиевич отурчу, ал "Мекенчил" тобуна лидер болгондон кийин аны аксакал деп сыйлап "Ата-Журт Кыргызстандын" лидеринин 704-кабинетин бошотум бердим. Ал эми биздин катчылыктын жети кызматкери 4-кабатта 13 чарчы метр бөлмөдө отурат. 7-кабатка чыккан жок", — деди Сыдыков.
Андан соң Түмөнбаев эч качан жаңылыш сүйлөбөгөнүн айтып, квадраттык залда "Мекенчил" тобунун катчылыгы, 709-кабинетте "Ата-Журт Кыргызстандын" катчылыгы отурганын айтты. Ал эми ЖК төрагасы Нурланбек Шакиев кабинет боюнча маселелерди коомчулукка даңазалабай ич ара кароого чакырды.
