Айтбаев: айыл өкмөт, мэрлерди окутуу керек
© Sputnik / Асель Акматалиева
Жазылуу
Жергиликтүү өз алдынча башкаруу союзунун жетекчисинин орун басары Данияр Айтбаев аймактагы саясий кызматты ээлегендер бат-баттан өзгөргөндүктөн институттук эс тутум жоголуп, ишке кедергисин тийгизерин айтты.
Айыл өкмөт, мэрлерди өлкө мыйзамдары, инвестиция тартуу, республикада иш алып барган донордук уюмдар боюнча кыска окутуулардан өткөрүү зарыл. Мындай пикирин Данияр Айтбаев Sputnik Кыргызстан радиосуна маек куруп жатып билдирди.
Айтбаев: айыл өкмөт, мэрлерди окутуу керек
Анын айтымында, Жергиликтүү өз алдынча башкаруулар союзу "Мыкты тажрыйбалар" деген портал ачты.
"Айыл өкмөт, мэрлер да саясий кызматкерлер. Айрым учурларда бат-баттан алмашкандыктан ошол жерде жасалып жаткан иштер чынжырча түрүндө уланып кетпей токтоп калат. Жаңы жетекчи баары менен таанышып, иштин көзүн таап кеткенче убакыт өтөт. Андыктан институттук эс тутум дегенди сактап калган система зарыл. Бул үчүн биринчи кезекте аймактык башкаруучуларды тиешелүү мыйзамдарды билүүгө, донорлук уюмдар менен иштешүү, инвестор тартуу, проект жазууну үйрөткөн кыска курстардан окутуп чыгаруу абзел. Биз бул максатты көздөп Борбор Азиядагы жергиликтүү өз алдынча башкаруу академиясын түздүк. Ага айыл өкмөт, мэрлер келип окуй алышат. Сабактарды тажрыйбалуу, ишти билген адистер өтөт. Мындан сырткары, "Мыкты тажрыйбалар" деген портал ачылды. Анда буга чейин кайсы бир аймакта ийгиликтүү ишке ашкан долбоорлор жүктөлөт. Мындан башка аймактын жетекчиси балким өзүнө үлгү алар", — деди Айтбаев.
Ал ошол эле убакытта жигердүүлүк менен эмгектенип өз аймагын өнүктүрүп жаткан шаар башчы, айыл өкмөттөр да жок эместигин кошумчалады.
