Рыскулова: зомбулук көргөндөр мамлекеттен адекваттуу жардам ала элек
© Sputnik / Асель Сыдыкова
Жазылуу
"Сезим" кризистик борборунун жетекчиси Бүбүсара Рыскулова үй-бүлөлүк зомбулукка каршы күрөшүү мыйзамы натыйжалуу иштебей жатканын айтты.
Мамлекет жабырлануучулардын укугун коргоо максатында 2003-жылы биринчи "Үй-бүлөлүк зомбулукка каршы күрөшүү жөнүндө" мыйзамдын долбоорун кабыл алган. Андан кийин 2017-жылы жаӊы мыйзам долбоору жазылды. Бул тууралуу Бүбүсара Рыскулова Sputnik Кыргызстан радиосунун эфиринде маек куруп жатып билдирди.
Рыскулова: зомбулук көргөндөр мамлекеттен адекваттуу жардам ала элек
Анын айтымында, КМШ өлкөлөрүнүн ичинен Кыргызстан биринчилерден болуп "Үй-бүлөлүк зомбулукка каршы күрөшүү жөнүндө" мыйзамдын долбоорун иштеп чыккан.
"Учурда депутат Динара Ашимова "Үй-бүлөлүк зомбулук менен күрөш чөйрөсүндөгү айрым мыйзам актыларына өзгөртүүлөрдү киргизүү жөнүндө" мыйзам долбоорун сунуштады. КМШ өлкөлөрүнүн ичинен Кыргызстан биринчилерден болуп зордук-зомбулукка каршы күрөшүү жөнүндө мыйзам долбоорун иштеп чыккан, муниципалдык баш калкалоо жайын ачкан. Аракеттер көрүлгөнү менен дал ушул убакытта жабырлануучулар адекваттуу жардам ала элек. Учурда аялдарга жана балдарга карата зомбулуктун алдын алуу жана жоюу боюнча иш-чаралар аркылуу коомчулуктун маалымдуулугун жогорулатуу, бул көйгөйгө коомчулуктун көңүлүн буруу аракеттери көрүлүп жатат. Мамлекет аз камсыз болгон үй-бүлөлөр үчүн акысыз юридикалык жардам көрсөткөн кызматтарды киргизди. Алсак, зордуктоо сыяктуу оор кылмышты күчтүү адвокаттар колго алышы керек. Күчтүү адвокаттар чоӊ шаарларда эле бар. Зордук-зомбулук, сексуалдык оор кылмыш кылгандар мыйзамга ылайык 40 саат жумушка тартылып, мамлекетке 50 миӊ сом айып пул төлөйт. Мыйзам жазып жатканда ойлонуп жазыш керек да. Жабырлануучу ооруканага жатып, бала-чакасы менен кайда барарын билбей калган учурлар бар. Бул акчанын бир пайызын мамлекет алып, калганын жабырлануучуга бериш керек деп эсептейм", — деди Рыскулова.
Ал Кыргызстан боюнча "Коркпо! Токтот! Жаша!" девизи астында гендердик зомбулукка каршы 16 күндүк кампания старт алганын кошумчалады.
