Онкомаммолог: ракка кабылгандардын убактысын табыптар алып коёт

Жазылуу
НовостиTelegram
Аялдар эмчек ооруларын алдын алуу үчүн түрдүү жаракаттардан абайлап, жок дегенде эки жылда бир жолу дарыгердин текшерүүсүнөн өтүп турушу керек.
Акыркы жылдарда аялдар арасында эмчектин залалдуу шишик оорусу көбөйүүдө. Бул тууралуу хирург-онкомаммолог Бакыт Карыпбеков маек куруп жатып айтты.
Ал билдиргендей, аталган илдеттин алдын алуу үчүн ар бир аял үй шартында эмчегин кармап көрүп, анын көлөмүнө көңүл буруп, колтуктун алдындагы бездердин да чоңоюп кетпегенин байкап туруусу зарыл. Мындан тышкары, 30 жаштан өткөн кыз-келиндерге бир-эки жылда сөзсүз бир жолу маммологдун текшерүүсүнөн өтүп туруу боюнча кеңешин айтты.
Карыпбеков аялдардын бойдон алдыруусу да айрым учурда эмчек ооруларына алып келерине токтолду.
"Бойго бүткөндө организм кош бойлуулукка даярданат. Гормондор ага ылайыкташып баштайт. Бойдон алдыруу менен организмдин өзгөрүүсүн сырткы күч менен токтотобуз. Ошондо эмчек безинин функциялары өзгөрө түшөт. Мындан улам мастопатия сыяктуу өнөкөт оорулар пайда болушу мүмкүн. Ал ооруларды дарылабаса залалдуу шишикке айланат", — деди Карыпбеков.
Ошол эле учурда ал ракка кабылган аялдар дарыгерге ишенип, өзү да өжөр болсо аталган илдеттен айыгышы мүмкүн экенин кошумчалады.
"Бул оорунун өтүшүп кетишине көп учурда табыптар "салым" кошуп калат. Үч ай ичесиң, беш ай ичесиң, бир жыл ичесиң деп дары чөптөрдү берет окшойт. Бул учурда бейтаптарда оору ого бетер өтүшүп, башка органдарга метастаза бере баштайт. Болбой калганда бизге келишет. Табыптар бул ооруну айыктыра албайт, алар айыктыра турган болсо онкологиянын кереги жок болмок да", — дейт Карыпбеков.
Мындан тышкары, хирург аялдар баланы туура эмизүүгө, аны эмчектен туура чыгарууга да маани берүү зарыл экендигине токтолду.
Тема боюнча:
Импотенцияга кабылган эркектерге протез коёбуз. Урологдун видеомаеги
Эркектердин гигиенасы жана өнөктөш алдындагы жоопкерчилиги. Урологдун видеомаеги
Жаңылыктар түрмөгү
0